Songs 46 - Hawaii Pidgin Bible

God Stay Oua Side

Fo da main music guy. Da Korah ohana guys make dis song fo sing falsetto kine.

¹ God, he jalike one place Fo us guys go hide. He make us guys stay strong Fo notting bad happen. Wen get all kine trouble, God stay ready Fo help us guys plenny.

² Dass how come us guys no stay sked, No matta get earthquake An da mountains fall down An broke into small pieces An fall down inside da ocean.

³ Da watta inside da ocean Goin make big noise An goin get plenny spray! Da mountains goin shake Cuz da waves come real big! (Time out fo da music.)

⁴ Da peopo stay live inside da big town Wea get one riva. Dass wea da God Dass Mo Importan Den All Da Odda Gods Get his spesho place. Da peopo ova dea, dey feel real good Cuz a da watta from da riva.

⁵ God, he stay right dea In da middo a da town. Az why no mo notting Can wipe out da peopo dea. God goin help dem, Even wen come early morning time.

⁶ Wen God tell someting, Soun jalike thunda. Da diffren peopos, Dey make plenny noise, cuz dey sked! Dea govmen guys, Dey no can stan up strait! Jalike da groun stay melt unda dem!

⁷ Da One In Charge, Da God Ova All Da Armies, He stay right hea wit us guys! Him da God dat oua ancesta guy Jacob wen pray to, God one strong wall Dat no let nobody attack us guys! (Time out fo da music.)

⁸ Go come see da kine tings Da One In Charge stay do! He do awesome an unreal tings Fo wipe out plenny place All ova da world,

⁹ An all ova da world, He make peopo pau fight So dat no mo war. He broke dea bows fo shoot arrow, An broke dea spears too, An burn up dea shields wit fire.

¹⁰ He tell: “No fight! No foget dis: Me God! All da diffren nations goin know Dat I da main one. All ova da world Dey goin know dis!”

¹¹ Da One In Charge, Da God Ova All Da Armies, He stay right hea wit us guys! He da God Dat oua ancesta guy Jacob Wen pray to. He da One dat make shua Nobody attack us guys! (Time out fo da music.)