Songs 42 - Hawaii Pidgin Bible

Book Numba Two ( Songs 42–72 ) One Guy Dat Live Far From His Country Tink Bout God

Da pries guys from da Korah ohana make dis song fo teach. Dis song an Song 43, befo time was one song.

¹ Eh God! I like know you real good inside, Jalike one deer Dat gotta find one stream Fo drink watta.

² Inside, I tink lidis: “I like see da God dat stay alive, Jalike I stay thirsty fo see him! I like know wen I can go by him Fo stan in front him!”

³ Ery time, peopo stay aks me, “Eh! Yoa God, How come he no stay by you?!” An da ony ting I do, I cry, Day time an nite time!

⁴ I spill my guts, Cuz I no foget how was befo time. Dat time, I wen go In front plenny peopo Fo bring dem by da Temple fo God, Wit erybody amping out Cuz dey stay real good inside. Had choke plenny peopo stay tell God “Mahalo plenny!” An all dem go togedda fo pray to him!

⁵ I tink lidis: “Eh! How come I stay all bum out inside? How come I stay moan?! Mo betta I wait fo God help me! Cuz you know wat? I still goin get Good tings fo tell bout him! Him, he da God fo me, An he stay get me outa trouble.”

⁶ Eryting inside stay all bum out. Still yet, I goin tink plenny Bout you, my God, No matta I stay on top Mount Hermon O on top da Mizar Hill, An inside da land Wea da Jordan Riva start.

⁷ I feel jalike I stay Inside da real deep place Inside da middo a da ocean. Da watta make big noise, Soun jalike all da wattafalls You wen make. Da watta come all aroun me. Jalike all da big waves Dat you sen on top me.

⁸ Day time, Da One In Charge Stay show me Dat he stay tight wit me. He do dis fo do good tings fo me. Nite time, I get one song fo sing to him, Dat song, jalike one prayer To da God dat make me live.

⁹ I goin talk lidis to God: “Eh! You jalike One big solid rock fo me! So, how come You wen foget bout me?! How come I gotta live all sore inside, Erytime da peopo dat stay agains me, Come afta me?!”

¹⁰ Da peopo dat stay agains me, Dey like make me come shame, Jalike my bones real sore, Enuff fo kill me. All day dey talk: “Eh! Yoa God, how come He no stay by you?!”

¹¹ I tink lidis: “Eh! How come I stay all bum out inside? How come I stay moan?! Mo betta I wait fo God help me! Cuz you know wat? I goin get good tings fo tell Bout him still yet! Him, he da God fo me, An he stay get me outa trouble.”