Songs 41 - Hawaii Pidgin Bible

Fo da main music guy, one David kine song

¹ Whoeva tink plenny Bout how fo help da peopo Dat no mo notting, Dey can stay good inside! Da One In Charge, goin help dem Wen bad tings happen to dem!

² Da One In Charge make shua Notting bad happen to dem! An make shua dey stay alive, An stay good inside, inside da Israel land! He no let da peopo dat stay agains dem Make any kine to dem!

³ Da One In Charge help um come good Wen dey stay sick! Erytime dey gotta stay in bed Cuz dey no feel good, Try make da sick come mo betta!

⁴ Dis wat I wen tell: “Eh! You Da One In Charge! Dis me! I like you do someting good fo me! I like you make me come good. I sick cuz a all da bad tings I wen do agains you.”

⁵ Da guys dat stay agains me talk bad bout me. Dey tell: “We like him mahke! We like his name get wipe out An erybody foget who him!”

⁶ Dey come by me fo visit, But ony talk junk kine stuff. Dey like find out wen bad stuff Happen to me. Den dey go all ova da place Fo talk bout dat.

⁷ All da peopo dat hate me, come togedda Fo wispa to each odda bout me. Dey tink all kine bad stuff bout me.

⁸ Dey tell: “Az one real bad sick he get! Az why he stay in bed now, But no way he goin get up One mo time!”

⁹ Even my bestes fren, Da guy I wen trus plenny, Da guy dat stay an eat at my house Befo time, Even him wen go agains me!

¹⁰ But you, Da One In Charge, I like you do good tings fo me An get me up outa da bed Fo me pay back dose peopo Fo wat dey wen do.

¹¹ Wen da peopo dat stay agains me No can tell, “Us guys win!” Den I goin know Dat you stay good inside Wen you tink bout me.

¹² You hold me up so I no fall down Cuz I stay all pono inside. Az why you goin let me stan In front you foeva.

Book Numba One Pau

¹³ Eh you guys! Tell good tings Bout Da One In Charge! He stay da God fo us Israel peopo From befo time till foeva! Dass how he stay! Dass it!