Songs 39 - Hawaii Pidgin Bible

Fo Jedutun, da main music guy, one David kine song

¹ Dis wat I wen tell: “I goin watch how I live, So I no tell bad kine stuff. I goin make shua I shut my mout Weneva get peopo nea me Dat stay do bad kine stuff.”

² Az how come I no tell notting. I no talk notting, Even bout da good kine stuff. But dat ony make me hurt Mo plenny inside!

³ Inside, bodda me plenny. All da time I stay moan, Jalike get one fire Dat stay burn inside me. Den, I wen start fo talk. Dis wat I tell:

⁴ “Eh! You Da One In Charge! Make me know fo real kine Dat one day, I goin mahke, Dat I no mo choke plenny days. Try let me know dat my life short.

⁵ Fo shua, you give me Ony litto bit mo time. Da time from wen I born till I mahke, Jalike notting da way you see um. But erybody dat stay live, Dey ony goin breave short time. (Time out fo da music.)

⁶ “Peopo jalike one shadow Stay walking aroun. Dey run aroun plenny, But ony wase time, Jalike da wind dat come an go. Dey pile up plenny stuffs, But dey donno who goin get da stuffs Afta dey mahke.”

⁷ So den, Boss—wat I stay wait fo?! You da one I stay shua goin help me.

⁸ Get me outa all da huhu I wen make agains you. So dat da stupid kine peopo No goin talk bad bout me.

⁹ I no can tell notting. I no goin open my mout, Cuz you da one stay punish me.

¹⁰ No bus up me no moa! You come afta me real strong, I had it awready!

¹¹ Erytime you punish somebody Cuz dey wen do wass wrong, You take away eryting dey like, Jalike wen da moth eat da clotheses. Da peopo, jalike dey breave one time, Den dey gone awready! (Time out fo da music.)

¹² Eh! You Da One In Charge! Try lissen wen I pray! Lissen wen I yell to you fo help me! Wen you hear me stay cry, No hold back! Cuz I ony one guy Dat stay hea wit you short time, Jalike all my ancesta guys.

¹³ No get mad face at me no moa! Let me smile one mo time Befo I go way an mahke.