Songs 37 - Hawaii Pidgin Bible

Trus God An Wait

One David kine song

¹ Da guys dat do bad kine stuff, No let dem make you come huhu. An no go tink “I like be Jalike dem guys Dat stay do wass wrong.”

² Cuz dey goin dry up fas Jalike da grass. Dey goin mahke jalike da green grass.

³ Trus Da One In Charge an do good tings. Live on top yoa land An take kea da land.

⁴ Stay good inside Bout wat Da One In Charge stay do, Den he goin give you Eryting you like.

⁵ Let Da One In Charge handle Eryting you goin do. Trus him, an he goin do um.

⁶ He goin shine da light On eryting you stay do dass right Fo make shua erybody know dis. An God goin show you do da right ting In front him, da judge. An dass jalike wen can see eryting Real good wen da sun stay strong.

⁷ No tell notting, jus wait In front Da One In Charge. Hang in dea, an wait Fo Da One In Charge take kea you. No come huhu if some odda guy Stay make plenny money An no let um bodda you Wen da peopo make One no good kine plan an do um.

⁸ No come huhu, no come mad. No let notting bodda you, Cuz dat ony goin hurt somebody.

⁹ Da guys dat do bad kine stuff, God goin cut um off from him. But da peopo dat wait Fo Da One In Charge fo take kea dem, Dey da ones goin get da land Da One In Charge wen promise dem.

¹⁰ Ony litto bit moa, An no goin get Da peopo dat do bad kine stuff. You goin look all ova da place Wea dey stay befo, An dey no goin be dea.

¹¹ But da peopo dat no get big head An no need be da numba one guy, Dey da ones goin get da land Dat Da One In Charge wen promise dem, An dey goin stay good inside Cuz eryting go good fo dem.

¹² Da bad peopo make One no good kine plan Agains da peopo dat do Wass right erytime. Da bad peopo grind dea teet Cuz dey so mad wit da good peopo.

¹³ But da Boss, he ony laugh At da bad peopo, Cuz he know dat bumbye Dey gotta stan in front him, da Judge.

¹⁴ Da bad guys, dey pull out dea sword An make ready dea bows an arrows Fo kill da guys dat suffa plenny, An da guys dat no mo notting. Da bad guys like kill da peopo dat live da right way.

¹⁵ But dose bad guys, God goin make Dea sword go thru dea heart! God goin broke dea bows an arrows!

¹⁶ No matta da guys dat do wass right Get ony litto bit stuff, Dass still mo betta Den all da stuff da bad guys get.

¹⁷ Cuz Da One In Charge, He goin broke da bad guys arms, But he goin help da guys Dat do wass right.

¹⁸ Da peopo dat ack So dat nobody poin finga dem, Da One In Charge, He tink plenny bout dem. Da land he goin give dem Cuz dey his kids goin stay foeva.

¹⁹ Wen eryting stay bad, Dey no goin come shame. Wen no mo notting fo eat, Dey goin get plenny fo eat.

²⁰ But da peopo dat do bad kine stuff, Dey goin come wipe out. Da guys dat go agains Da One In Charge, No goin get dem no moa, Jalike da grass inside da valley No mo wen da fire come.

²¹ Da peopo dat do bad kine stuff, Wen dey borrow money from you, Dey no pay you back. Da guys dat do wass right, Dey like give stuff to peopo Fo kokua dem.

²² Da peopo dat Da One In Charge Do good tings fo, Dey da ones dat goin get da land Cuz dey his kids. Da peopo Da One In Charge Put kahuna on top dem, Dey goin get cut off from him.

²³ Wen Da One In Charge change somebody Fo dem come solid, Da One In Charge stay good inside Cuz a how da guy ack.

²⁴ No matta da guy trip, He no goin fall down, Cuz Da One In Charge Goin help him stan up.

²⁵ Befo time, I was one small kid, An now I one ol man. All dat time, I neva see God foget Bout nobody dat do da right ting. I neva see dose guys kids Stay beg fo get someting fo eat.

²⁶ Da peopo dat do da right ting, Dey erytime get one good heart Fo lend stuff to peopo. Peopo tell, “Wen God wen give kids To dose good guys, Was good wat he wen do fo dem!”

²⁷ Get away from da bad kine stuff, An do good. Den you goin live on top da land Da One In Charge give you, foeva.

²⁸ Cuz Da One In Charge, He like fo peopo do wass right, An he no foget da peopo Dat stay tight wit him. Dose peopo, God goin take kea dem Foeva! But da peopo dat do da bad kine stuff, Even dea kids goin get cut off From God foeva!

²⁹ Da peopo dat do da right ting, Dey goin get da land An dey goin stay live dea foeva.

³⁰ Da peopo dat do wass right, dey tink plenny, So den dey know wat fo do erytime. Dey erytime talk bout Wat dey suppose to do.

³¹ Da Rules dat God teach um Stay inside dem. Dey no jam up notting.

³² Da guys dat do bad kine stuff Stay look fo how fo grab Da peopo dat do da right tings Fo kill um,

³³ But Da One In Charge no goin let Da bad guys take ova da good guys. Even if da good guys gotta go In front da judge, Da One In Charge no goin let notting bad happen to dem.

³⁴ Wen you stay wait Fo Da One In Charge do stuff fo you, Make shua you do eryting How he like. He goin make you come importan Fo you take ova da land. An wen he cut off da peopo Dat do bad tings, You goin see um happen.

³⁵ One time, I wen see one real bad guy. Erybody sked a him. Da guy look solid, Jalike one tree dat grow good dea Fo one long time.

³⁶ Den one day, I wen go by dea, An you know wat?! No mo da bad guy! I wen go look fo him, But no can find um.

³⁷ Go check out da peopo dat do good! Look da peopo dat do da right ting! Cuz God goin make eryting go good Fo dose peopo, Dea ohana goin stay fo long time.

³⁸ But da peopo dat no like lissen notting, God goin wipe all dem out one time. Da bad guys, dea ohana Goin get cut off from God foeva.

³⁹ Wen da peopo dat do wass right No can get outa trouble, Da One In Charge get um outa trouble. He take kea dem, Jalike dey get One strong place fo hide.

⁴⁰ Da One In Charge help dem An make shua notting happen to dem. He no let da bad peopo Do notting to dem, Cuz da peopo dat do wass right, Dey aks Da One In Charge Fo no let notting hurt dem.