Songs 32 - Hawaii Pidgin Bible

How God Hemo Yoa Shame

One David kine song fo teach

¹ You goin stay good inside If God hemo yoa shame Fo da stuff you wen do agains him, An if God no hold agains you, Da bad kine stuff you wen do.

² Eryting goin go good fo you If Da One In Charge no tell He gotta punish you, An if you da kine guy Dat no bulai notting inside.

³ Had one time, I neva tell notting Bout da bad tings I wen do, Dat time, my body wen come all weak An all day I ony stay moan real loud.

⁴ Day time an nite time, I get heavy kine presha from you. All my powa stay suck outa me, Jalike I all dry up, summa time. (Time out fo da music.)

⁵ But den, I wen tell you fo real kine Dat I wen do bad tings, An I no try fo hide no moa Wat I know was wrong fo me do. I wen make up my mind, Dat I goin tell Da One In Charge All da tings I wen do agains you. Cuz a dat, you wen let me go, An hemo da shame Fo da bad tings I wen do. (Time out fo da music.)

⁶ Cuz a dat, I like tell dis: All da peopo dat stay tight wit you, Good dey pray to you Erytime dey get trouble. Jalike wen da big flood come down, An no hit dem.

⁷ You, you jalike one place Wea I can hide from trouble. You proteck me wen get hard time. You put peopo aroun me Dat yell plenny Cuz dey stay good inside, Cuz you wen get me outa trouble. (Time out fo da music.)

⁸ Da One In Charge tell: “I goin help you undastan An show you da way you suppose to go. I goin tell you wass da bestes ting fo you fo do, Cuz I stay watch out fo you.

⁹ No ack jalike da horse o da mule Dat no undastan Wea dey suppose to go, You gotta use da bit an da bridle Fo no let um run away.”

¹⁰ Da peopo dat do bad kine stuff, Dey goin suffa plenny. But whoeva stay trus Da One In Charge, God goin do all kine stuff Fo show he stay tight wit dem!

¹¹ Eh! All you peopo dat get um right Wit Da One In Charge, Stay good inside, Cuz you stay tight wit him! All you guys dat get one good heart Fo do da right ting, Dance an sing, Cuz you stay real good inside!