Songs 30 - Hawaii Pidgin Bible

Mahalo To God

One David kine Song Fo God, da time dey give da Temple to God

¹ Eh! You Da One In Charge! I stay tell good tings bout you Cuz you get me outa trouble! Da peopo dat stay agains me, You no let dem win ova me An feel good bout dat.

² Eh! You Da One In Charge! You da God fo me. I wen yell fo you help me, An you wen help my body Come good one mo time.

³ Eh! You Da One In Charge! Wen I litto mo mahke, You wen bring me back alive. You wen make me live, Fo me no go down inside da grave Wea da mahke peopo go.

⁴ Eh! All you peopo Dat stay tight wit Da One In Charge! Sing to him! Tell dat you know wat kine god him, Cuz you guys no foget Dat Da One In Charge stay good an spesho.

⁵ Ony fo short time, he come huhu But all yoa life, he do good stuff fo you All nite, you feel jalike you goin cry, But den morning time come, An you like yell Cuz you stay feel real good inside.

⁶ Me, had one time I neva worry bout notting. Dat time, I wen tink, “No mo notting goin throw me off, eva!”

⁷ Eh! You Da One In Charge, you wen like do good tings fo me, An cuz a dat you wen make me Come strong an solid, Jalike one mountain. But den, you wen tell “Laytas” to me, An dat make me real sked.

⁸ You da One I yell to fo help me, Da One In Charge! You da boss, an I goin beg you Fo give me chance. I wen tell,

⁹ “Eh Boss! How dat goin help you If you kill me? How dat goin help If I go down inside my grave? How da dirt down dea inside da grave, Goin tell peopo fo trus you, aah?”

¹⁰ So den, you Da One In Charge. Lissen to me an do good stuff fo me! Eh! You Da One In Charge! Help me plenny!

¹¹ Wen I was sad an crying, You wen make me feel good inside, So I like dance an sing! Wen I was wearing ony funeral kine clotheses, You wen take um away An give me clotheses dat show I feel good inside!

¹² Cuz you wen do dat, Now eryting inside Sing bout how good you stay. Dass why inside me I no stay quiet. Eh! You Da One In Charge! You da God fo me! I goin tell good tings bout you, All da time!