Songs 3 - Hawaii Pidgin Bible

God Get His Peopo Outa Trouble

One David kine song fo no foget da time he run away from his boy Absalom

¹ Eh God! Get real plenny peopo dat stay agains me! Get choke peopo dat attack me.

² Plenny peopo tell dis bout me: “No way God goin get dat guy Outa trouble!” (Time out fo da music.)

³ Eh! You Da One In Charge! You, jalike one shield aroun me, Dat no let me get hurt. You da one dat make me come awesome You put me back on top my throne.

⁴ I wen yell to Da One In Charge Fo help me. He hear me up dea On top da mountain Dat stay spesho fo him, An he help me. (Time out fo da music.)

⁵ I wen lay down an go sleep, An nex morning I wake up, Cuz Da One In Charge, He take kea me.

⁶ No matta get ten tousan army guys Dat come agains me from all ova, I no sked.

⁷ Eh! You Da One In Charge! You gotta do someting! Eh, you my God! Get me outa trouble! All da guys dat stay agains me, Slap dea head! Da peopo dat do bad tings, Punch dea face!

⁸ Eh! You Da One In Charge! You da One Dat get me outa trouble. I like you do good tings Fo all yoa peopo! (Time out fo da music.)