Songs 26 - Hawaii Pidgin Bible

One Guy Dat Do Da Right Ting Pray To God

One David kine song

¹ Eh! You Da One In Charge! You da judge, So tell erybody I neva do notting bad! Cuz da way I live, I do eryting how I suppose to do. I stay trus you, Da One In Charge, An I no change my mind.

² So tes me, Da One In Charge. Make me pass yoa tes. Hemo all da junks I get inside, Look deep inside me, An look inside my head.

³ Cuz all da time, I know fo shua you stay tight wit yoa peopo. Da way I live, I know I can trus you.

⁴ I no hang out wit da kine guys dat do wase time kine stuff. I no stick aroun da ones dat like hide wat dey do.

⁵ Wen da peopo dat do bad kine stuff come togedda, I no like wat dey do! Da peopo dat no stay do wass right, I no hang out with dem!

⁶ Eh! You Da One In Charge! Inside yoa Temple, I goin wash my hands Fo show dat I neva do notting wrong. Den I goin walk aroun yoa altar fo make da sacrifice ready.

⁷ Same time, I goin make shua erybody hear me tell Dat you da bestes. I goin tell da story Bout all da awesome kine tings you do.

⁸ Eh! You Da One In Charge! Fo real kine, I like da house wea you live! Fo real kine, I like go da place Wea peopo see how awesome you stay!

⁹ Wen you go afta da peopo dat do bad kine stuff, No take away my life, same time. Wen you go afta da killa guys, Make shua I no mahke!

¹⁰ Dem guys, dey real sly buggahs Fo make bad kine stuff happen. Peopo give dem plenny unda da table kine money.

¹¹ But me, da way I live, I do eryting how I suppose to do. Az why, get me outa trouble An do good tings fo me.

¹² Now, jalike I get one solid place fo stan on top Dat stay flat, az how I no goin fall down. An ova hea, wea all God peopo come togedda, I goin tell, “Da One In Charge, he do real good tings fo me!”