Songs 24 - Hawaii Pidgin Bible

Go Fo Meet Da Awesome King

One David kine Song Fo God

¹ Da One In Charge, he own Da whole world an eryting dea. He own da land An all da peopo dat live dea.

² He wen make da world stay solid Ova da ocean, He wen set um up Ova da currents Dat run undaneat.

³ Da peopo tell: “Wat kine peopo Get da right Fo go up da mountain Wea Da One In Charge live? Wat kine peopo get da right Fo stan inside his spesho Temple?”

⁴ Da prieses tell: “Ony da kine peopo Dat do good an tink good can go dea, Jalike dey get clean hands An stay clean inside. Da ones dat no like show Love an respeck Fo da wase time kine idol gods, An wen dey make one promise, Dey no bulai bout him.

⁵ Fo dat kine peopo, Da One In Charge Goin make eryting Come good fo dem. God goin tell dey wen do da right ting An he goin get um outa trouble.

⁶ Dey da kine peopo dat like go In front God, Da kine peopo dat like stay Nea da God Jacob wen pray to.” (Time out fo da music.)

⁷ Da peopo tell: “Open up da Temple gates! Da doors dat stay from befo time, Open um! Da awesome King, he like go inside!”

⁸ Da prieses tell: “Dat awesome King, who him?” Da peopo tell: “Az Da One In Charge! An he strong an know how fo fight. Az Da One In Charge! He know how fo win da war.”

⁹ “Open up da Temple gates! Da doors dat stay from befo time, Open um! Da awesome King, he like go inside!”

¹⁰ Da prieses tell: “Dat awesome King, who him?” Da peopo tell: “Az Da One In Charge, Da God Ova All Da Armies, Him, he da awesome King!” (Time out fo da music.)