Songs 23 - Hawaii Pidgin Bible

Da One In Charge Take Kea His Peopo

One David kine Song Fo God

¹ Da One In Charge, he take kea me, Jalike da sheep guy Take kea his sheeps. Az why I get eryting I need.

² Jalike he bring me fo lay down Wea da choice an sof grass stay, An take me by da calm watta.

³ He make me come strong One mo time inside. He take me on da bestes trail, Fo erybody know wat kine god him.

⁴ God, even if I go thru One real dark valley Wea can mahke dea, I no goin come sked Dat someting bad goin happen, Cuz you stay wit me. You carry one club Fo get me outa trouble, An one stick fo walk Fo show me wea fo go. An dat make me no worries Cuz eryting goin be okay.

⁵ You set up da tables An put food on um in front me, Fo da guys dat stay agains me See wat you do fo me. You put olive oil on top my head Fo show you get aloha fo me. You make shua my drinking cup Stay full erytime.

⁶ Fo shua, you goin do good tings fo me, An stay tight wit me cuz I yoa guy, Ery day I live. An I goin live foeva Da house wea you live, Da One In Charge.