Songs 150 - Hawaii Pidgin BibleTell Good Tings Bout Da One In Charge! 1 Eh you guys! Tell good tings Bout Da One In Charge! Tell good tings bout God, Inside da place dat stay spesho fo him! Tell good tings bout Da One inside da sky Cuz da sky show dat he strong! 2 Tell good tings bout God, Cuz God do tings fo show How strong him! Tell good tings bout how He mo importan den erybody! 3 Blow da sheep horn trumpet real loud Fo tell good tings Bout Da One In Charge! Play da bass harp an da regula harp Fo tell good tings Bout Da One In Charge! 4 Shake da tammorine, an dance Fo tell good tings Bout Da One In Charge! Use string kine instrument an flute Fo tell good tings Bout Da One In Charge! 5 Play da small kine cymbals An da big kine cymbals Fo tell good tings Bout Da One In Charge! 6 Eryting dat breave, tell good tings Bout Da One In Charge! Eh you guys! Tell good tings Bout Da One In Charge! |