Songs 15 - Hawaii Pidgin Bible

Wat God Like

One David kine song

¹ Eh! You Da One In Charge! Tell me who get da right Fo live wit you, in da place you stay. Who get da right fo stay long time On top da mountain dat stay spesho fo you?

² Da One In Charge tell: “Fo get da right fo stay wit me, Dey gotta be da kine peopo Dat live so dat nobody can poin finga dem. Dey do da right ting erytime. Dey tell da trut erytime Cuz no mo notting inside dem dey like hide.

³ Dey no talk bad bout odda peopo. Dey no do notting fo hurt dea frenz. Dey no talk harsh kine to dea neighba guys.

⁴ Dey tink az bad Wen peopo do stuff dat God tell no good. Dey get respeck Fo da peopo dat stay sked a Da One In Charge. Dey stick erytime Wit wat dey wen promise in front God, No matta someting bad happen to dem cuz a dat.

⁵ Dey no charge extra interes Wen dey lend money. Dey no take dirty money From somebody dat like hurt one guy Dat neva do notting bad.” Dass wat God tell. Dat kine peopo, dey da ones Dat goin stan solid foeva!