Songs 149 - Hawaii Pidgin Bible

God Make His Peopo Da Winnas

¹ Eh you guys! Tell good tings Bout Da One In Charge! Sing one new kine song Fo Da One In Charge! Wen all da peopo dat stay tight Wit him come togedda, Tell good tings bout him!

² Eh you Israel peopo! Show how good You feel inside, Cuz Da One In Charge Wen make you guys! You peopo dat come togedda fo pray On top Mount Zion, Go dance an sing, Cuz you get Da One In Charge Fo yoa king!

³ Tell good tings bout Da One In Charge Cuz you know wat kine god him! Dance fo tell good tings bout him, An play tammorine an small harp, An sing fo him!

⁴ Do dat, cuz Da One In Charge Feel real good bout his peopo, Da ones dat know dey no need Go firs erytime. Da One In Charge make dem da winnas, An make um come awesome.

⁵ Dose peopo dat stay tight Wit Da One In Charge, Cuz dey da winnas An dey get plenny respeck. Even wen dey try go sleep, Dey tell good tings Bout Da One In Charge.

⁶ Da peopo dat stay tight wit God, Dey stay tell good tings bout him. An carry one sharp sword,

⁷ Fo pay back da bad kine tings Da diffren nations wen do. Fo shua, dey goin punish Da diffren peopos.

⁸ Dass dea job, Fo catch da odda peopos king guys, An tie um up wit chains, An put iron kine leg chains On top all da leada guys Dat da odda peopos get respeck fo.

⁹ God, da judge, wen write awready, Dat dose odda peopo gotta get punish. An da peopo dat stay tight wit God, Dey get da awesome job fo punish um. Eh you guys! Tell good tings Bout Da One In Charge!