Songs 148 - Hawaii Pidgin Bible

Eryting God Make, Tell Good Tings Bout Him Eryting Inside Da Sky

¹ Eh you guys! Tell good tings Bout Da One In Charge! Tell good tings bout Da One In Charge From da mos high part a da sky! Good, dey tell good tings bout him!

² All you angel messenja guys Fo Da One In Charge, Tell good tings bout him! All you army guys inside da sky, Tell good tings bout him!

³ Jalike peopo tell good tings Bout Da One In Charge, Az good fo da sun an da moon Do da same ting too! An same ting fo all da stars dat shine!

⁴ Jalike da peopo tell good tings Bout Da One In Charge, Az good, fo da mos high parts a da sky Do da same ting too! An same ting fo all da watta Dat stay ova da sky!

⁵ I like fo all dem tell good tings, Cuz dey know wat kine god Da One In Charge! He wen tell wat suppose to happen Inside da sky, An cuz a dat, az wat wen happen Up dea.

⁶ Da One In Charge, he wen put um Wea dey suppose to be Fo stay dea foeva. He wen make one rule fo dem, An dat rule no goin change.

Eryting On Top Da Earth

⁷ Da tings dat get on top da earth, Make shua dey tell good tings Bout Da One In Charge too, An all da big animals inside da ocean, Jalike dey tell da same ting too, An same ting fo all da watta In da mos deep places In da ocean.

⁸ Da fire too, an da hail from da sky, Da snow an da smoke, Jalike dey tell good tings Bout Da One In Charge too, An even da hurricane too, Dat do wat God tell um fo do.

⁹ Da mountains an all da hills, Jalike dey tell good tings Bout Da One In Charge, An same ting fo da trees wit fruits, An da big kine cedar trees.

¹⁰ Same ting fo da wild animals An da farm kine animals too, An same ting fo da tings dat run aroun On top da groun, An da birds dat fly.

¹¹ Da king guys all ova da world, An all da diffren kine peopos, Good, dey tell good tings Bout Da One In Charge! Same ting fo da leada guys An da govmen guys All ova da world too.

¹² Good, da young guys an wahines Tell good tings bout Da One In Charge, Da ol peopo an da young ones Togedda too.

¹³ Good, dey all tell good tings Bout Da One In Charge, Cuz dey know wat kine god him! Cuz he da ony one dat get One big name dass fo real, Fo be da mos awesome king In all da world an inside da sky!

¹⁴ Da One In Charge Stay make his peopo come strong. Dass how come Peopo tell good tings— All da ones dat stay tight Wit Da One In Charge, Da Israel ohana peopo, Da peopo dat stay tight wit him. Eh you guys! Tell good tings Bout Da One In Charge!