Songs 147 - Hawaii Pidgin Bible

Song Fo Da God Dat Get All Da Powa

¹ Eh you guys! Tell good tings Bout Da One In Charge! Cuz az good, you know, Us guys sing fo oua God. Az nice, we tell good tings bout him.

² Da one dat stay build Jerusalem town One mo time, az Da One In Charge! He bring back togedda da peopo Dat was prisonas Babylon side.

³ Wen dey stay real sore inside, He make um come good one mo time. Jalike he put one bandage On top da place dat stay hurt.

⁴ Da One In Charge, he wen tink How much stars he like make. Den he make um. An he give one name To all dem fo talk to dem.

⁵ Oua Boss, he big! He real strong! He undastan mo plenny Den us can undastan!

⁶ Da One In Charge, Fo da peopo dat no ack big, He help um. But fo da peopo dat stay do wass wrong, Jalike he throw dem down On top da dirt.

⁷ Sing fo Da One In Charge, Fo tell good tings bout him! Make music fo oua God Wit da small harp!

⁸ Da One In Charge, he da One Dat make da clouds cova da sky, An give da groun enuff rain, An him da one dat make da grass Come up all ova da mountains.

⁹ Da One In Charge, him da one dat give food To da farm animals, An to da bebe scavenja birds Weneva dey yell fo food.

¹⁰ So, wat you tink make Da One In Charge Feel good inside?! You tink how strong yoa horses?! O how fas yoa army guys run?! O wat?!

¹¹ Dis wat make Da One In Charge Stay good inside: Wen peopo get choke plenny respeck Fo Da One In Charge, Fo dem feel jalike dey sked In front him, An wen dey wait fo him help dem, Cuz dey know he stay tight wit dem.

¹² You Jerusalem peopo, tell good tings Bout Da One In Charge! You peopo dat go Mount Zion fo pray, Tell good tings bout yoa God!

¹³ Da One In Charge make yoa town gates Come mo strong Fo da peopo dat stay agains you No come inside. All da peopo dat come from yoa town, He make um fo dem do Wat he like um fo do.

¹⁴ He make shua dat da peopo Dat stay agains you No come inside yoa land. He give you da bestes kine wheat fo eat, Fo you eat all you like.

¹⁵ Da One In Charge tell fo do someting, Right den an dea, az jalike da earth Lissen an do wat he tell.

¹⁶ Da One In Charge sen da snow Jalike one blanket. He put ice all ova da groun jalike dirt.

¹⁷ Da One In Charge throw down hail From da sky. Wen he make da cold storm come, Nobody can handle dat, aah?!

¹⁸ Den, by da powa A wat Da One In Charge tell, He make da ice melt. He make his wind blow, An his watta flow inside da streams.

¹⁹ Da One In Charge, he da One Dat wen tell da Jacob ohana peopo Da tings he like fo dem know. He wen tell da Israel peopo (Dass da same Jacob ohana) His Rules An da tings he tell cuz he da judge.

²⁰ He neva do notting lidat Fo da odda peopos. Dey neva find out da tings Da One In Charge tell Cuz he da judge. Tell good tings bout Da One In Charge!