Songs 146 - Hawaii Pidgin Bible

God Get His Peopo Outa Trouble

¹ Eh you guys! Tell good ting Bout Da One In Charge! Fo me, I tink lidis: “Tell good tings Bout Da One In Charge!”

² All da time I stay alive, I goin tell good tings Bout Da One In Charge. Till I mahke, I goin sing songs Bout my God, Fo tell um how good he stay.

³ No trus some guy Jus cuz he one leada guy Wit one good heart, Cuz he ony one guy! He no goin get you outa trouble!

⁴ Dat kine guy, Bumbye he no goin breave no moa, He goin go back inside da groun. Right den an dea, Eryting da guy plan fo do Goin come poho.

⁵ Whoevas get da God Dat Jacob wen pray to fo help dem, Dey can stay good inside. Dey stay shua dat bumbye Da One In Charge goin do Good tings fo dem, Cuz he da God fo dem.

⁶ God, he da One wen make da sky An da earth, Da ocean too, an eryting inside um. Fo shua can trus Da One In Charge foeva, Fo do wat he tell he goin do.

⁷ God, he da judge dat make shua Dat da right ting happen Fo da pooa ting peopo Dat get plenny presha. He give food to da peopo Dat stay hungry, An he let da prisona guys go.

⁸ Da One In Charge, he da One Dat make da peopo Dat no can see, see, An help da peopo Dat gotta carry too much, fo stan up, An get love an aloha fo da peopo Dat stay do wass right.

⁹ Da One In Charge, he da One Dat take kea da foreign peopo Dat live wit us guys. He come fo help da kids Dat no mo muddah an faddahs An da widow wahines. But fo da peopo Dat stay do bad kine stuff, Da One In Charge jam up Da way dey like go.

¹⁰ Da One In Charge, He goin stay king foeva! You peopo dat go Mount Zion Fo pray to God, Yoa God stay king fo da peopo Dat stay alive now, An fo all da ones Dat goin come from dem bumbye! Eh you guys! Tell good tings Bout Da One In Charge!