Songs 144 - Hawaii Pidgin Bible

Da King Pray

One David kine song

¹ I like tell Da One In Charge “Mahalo!” Cuz he do plenny good tings fo me. I go by him fo hide, Jalike he one big solid rock. Him da one dat teach me how fo fight, An how fo make war.

² God stay tight wit me cuz I his guy, Jalike he one strong wall On top one mountain, Dat nobody can climb ova Fo come afta me. He da One make shua Notting bad happen to me, Jalike he one shield I use Fo no let nobody touch me. He da One give me da powa Ova da odda peopos.

³ Da One In Charge, I no can tink How come you like take kea peopo, O how come you even tink Bout us regula kine peopo.

⁴ Us peopo ony stay hea short time, Jalike one breat us guys breave, O jalike us one shadow Dat pass by fas.

⁵ Da One In Charge, make da sky Drop down low Fo you come down hea! Touch da mountains Fo make da smoke come out.

⁶ Make da lightning hit da peopo Dat stay agains you, Fo make um run all ova da place, Jalike you shoot um wit arrows Fo make um so dey donno Wat dey stay do.

⁷ Da peopo from anodda place Stay attack me, So put down yoa hand From up dea wea you stay, An no let dem capcha me. Get me outa trouble, Cuz dey jalike one flood Dat can wipe me out.

⁸ But dem, wen dey talk, No can trus wat dey tell. Wen dey put up dea right hand Fo make one promise, Dey ony bulai.

⁹ God, I goin make one new song fo you. I goin play music fo you Wit one ten-string harp,

¹⁰ Cuz you da one Dat get king guys outa trouble, An no let nobody come afta me, David, yoa worka guy, Wit one sword fo kill me.

¹¹ Da peopo from anodda place Stay attack me, So no let dem capcha me. Get me outa trouble. Wen dose peopo talk, No can trus wat dey tell. Wen dey put up dea right hand Fo make one promise, Dey ony bulai.

¹² Wen oua boys grow up, We like fo dem be Jalike plants dat grow good. We like fo oua girls come strong, Jalike da nice looking kine pos Dat da builda guys carve Fo da corna pos Aroun da king palace.

¹³ We like oua food storage place stay full Fo give us all diffren kine stuff Wen we need um. We like oua sheeps an goats Get plenny bebes, Tousan times mo plenny Aroun oua towns, Ten tousan times mo plenny In da country side.

¹⁴ We like da cows dat pull oua wagons Pull heavy kine stuffs. We like nobody bus up da walls, O drag peopo outa dea home Fo make um prisonas, O make um cry on top da streets!

¹⁵ Da peopo dat live good lidat, Dey can stay good inside! Dey da peopo dat get Da One In Charge fo dea God, An fo shua, dey goin stay good inside!