Songs 142 - Hawaii Pidgin Bible

David Pray Fo God Help Him

One poem from David, how he pray wen he hide inside da cave.

¹ I yell fo Da One In Charge help me. I talk loud wen I pray To Da One In Charge Fo give me chance.

² I tell him bout my problem, Jalike I pour eryting in front him. I make shua he know Wat stay bodda me.

³ Wen I come weak inside, Still yet, you da one dat know Da way fo me go. Cuz wea I walk, Az jalike peopo hide traps dea.

⁴ Try look aroun me fo see No mo nobody kea fo help me! Da place fo go wea nobody can hurt me, Gone awready! Nobody kea if I alive o mahke!

⁵ I yell fo you fo help me, Da One In Charge. I tell, “You, da one take kea me Fo nobody hurt me. I get ony you, All da time I live inside dis world!”

⁶ Try lissen wen I yell fo you help me, Cuz I stay all jam up! Get me outa trouble from da peopo Dat chase afta me, Cuz dey mo strong den me.

⁷ Jalike I all lock up, So get me out! Den I goin tell good tings bout you Cuz I know wat kine god you. I like fo all da peopo Dat stay do wass right Come by me too, Cuz you goin do good tings fo me.