Songs 140 - Hawaii Pidgin Bible

No Let Da Bad Peopo Hurt Me Da Guys Dat Stay Agains Me, How Dey Ack

Fo da main music guy, one David kine song

¹ Eh! You Da One In Charge! Help me get away From da bad kine peopo. Da guys dat like bus up peopo, No let um hurt me.

² Dem guys, dey erytime make plan Fo do bad tings, An all day dey go afta peopo Fo make um fight each odda.

³ Da stuff dey tell can kill you, Jalike one snake bite. Wen dey open dea mout, Eryting dey tell, Jalike da poison from da cobra snake. (Time out fo da music.)

⁴ Eh! You Da One In Charge! No let da bad guys catch me! No let da guys dat like bus peopo up, Hurt me, Cuz dey make one plan fo take me down.

⁵ Get peopo dat ack high makamaka Dat like put trap fo catch me. Dey spread out one rope net fo grab me. Dey put plenny trap Fo catch me by da road. (Time out fo da music.)

Eh God, No Let Me Get Hurt

⁶ I tell Da One In Charge dis: “You, you da God fo me!” Eh! You Da One In Charge! Wen I tell you fo help me, try lissen!

⁷ You Da One In Charge! You da Boss fo me! You strong fo get me outa trouble. You make shua I no get hurt Wen get war.

⁸ Eh! You Da One In Charge! No let dose bad peopo do Da kine tings dey like do to me. Eh God! Da tings dey plan fo do, No let um do um. (Time out fo da music.)

Wipe Out Da Peopo Dat Stay Agains Me

⁹ No let dose guys stan aroun me An ack jalike dey da winna! Da kine trouble dey tell Dey like do to me, Let um happen to dem, not me!

¹⁰ Make hot burning wood Fall down on top dea head. Throw um down inside da fire, O inside holes wit mud inside Wea dey no can get out.

¹¹ No let da ones dat talk bad Bout odda peopo get respeck Hea inside oua land. Da bad peopo dat like bus up erybody, Make bad tings come to dem, Ova an ova!

¹² But I know dis: You Da One In Charge, An you da Judge dat goin help Da peopo dat no mo notting. You goin make shua Dat da pooa peopo get dea rights.

¹³ An dis fo shua too: Da peopo dat erytime Do da right ting, Dey goin tell good tings bout you Cuz dey know who you. Da ones dat do wass right, Dey goin live togedda wit you.