Songs 138 - Hawaii Pidgin Bible

Song Fo Tell God “Mahalo”

One David kine song

¹ Eh Boss! I like go all out Fo tell good tings bout you! In front all da odda gods, I goin sing bout you.

² I goin face da Temple Dat stay spesho fo you Wen I go down fo pray. Dis fo show you love an respeck. I goin tell good tings bout you, Cuz I know who you. Cuz you erytime stay tight Wit yoa peopo, An cuz us guys can trus you Fo do wat you tell you goin do. Dass cuz you do wat you promise fo do, An dass da mos importan ting Peopo know bout you.

³ Weneva I yell to you fo help me, You help me. You make um so I no come sked Fo do wat I need fo do, Dass how you make me Come strong inside.

⁴ Eh! You Da One In Charge! Da king guys from all ova da world, I like fo dem tell dat you da greates, Wen dey hear da tings you tell.

⁵ Dass why dey goin sing Bout how you do tings. Dey goin tell: “Da One In Charge, He stay real awesome!”

⁶ Eh! You Da One In Charge! Fo shua, you importan, But still yet, you see wass happening Wit da peopo dat not importan. An da peopo dat get big head, No matta dey stay far, You know wat dey stay do.

⁷ No matta get trouble ery place I go, An da peopo dat stay agains me Stay huhu, You goin make shua I no mahke. You goin show yoa powa An bus dem guys up! You get da powa Fo get me outa trouble.

⁸ Eh! You Da One In Charge! You da One Goin make happen fo me, Eryting you wen promise fo do. You, Da One In Charge, An you stay tight Wit yoa peopo foeva! So den, no go bag From da peopo you wen make!