Songs 137 - Hawaii Pidgin Bible

Sad Cuz Dey Gotta Stay Babylon Side

¹ Us wen sit down By da rivas Babylon side An cry plenny, Cuz we tink plenny bout how Jerusalem town stay all bus up.

² Us wen hang up oua harp In da middo A da willow tree branches Fo no play um no moa.

³ Az cuz da guys dat wen capcha us, Tell us gotta sing fo dem. Da ones dat make us moan cuz we sad, Dey tell, “Go sing one happy kine song From Jerusalem town!”

⁴ You tink us can sing Bout Da One In Charge Inside anodda country Dass not oua country, o wat?! No can!

⁵ If I foget Jerusalem town, I like fo God make my right hand Come all any kine!

⁶ If I no tink plenny bout Jerusalem, O if I no tink dat Jerusalem da place Wea I erytime stay good inside, Mo den all da odda place, Den I like fo God make my tongue Stick to da top a my mout Fo me no talk!

⁷ Da One In Charge no foget Wat da Edom peopo wen do Da time da Babylon army guys wen take ova Jerusalem town. Dey wen yell, “Bus up da place! Wipe da place to da groun!”

⁸ You Babylon peopo, Garans you goin come all bus up. If somebody punish you Fo wat you wen make to us guys, Us like God make dem Stay good inside!

⁹ Anybody go grab yoa kids An smash um on one cliff side, Us like God make dem Stay good inside!