Songs 133 - Hawaii Pidgin Bible

Az Good Wen All You Braddahs Stick Togedda

Song fo sing wen you go up to da Temple Fo God, one David kine song

¹ Good, you know, Wen all da braddah guys Stick togedda jalike dey one. Dass goin make erybody Feel real good inside.

² Wen erybody stick togedda Jalike dey one, Dass jalike wen somebody put oil On top yoa head fo show aloha. Az jalike da time Moses wen make Aaron da firs Main Pries Guy, An he pour da spesho kine olive oil On top Aaron head, An da oil drip down his beard To da collar a da robe.

³ Wen erybody stick togedda Jalike dey one, Make you feel real good. Jalike wen dew go on da grass Morning time On top da hills aroun Jerusalem, An jalike on top Mount Hermon. Weneva peopo stick togedda lidat, Da One In Charge make shua Eryting go good fo dem, An dey get da real kine life To da max foeva!