Songs 131 - Hawaii Pidgin Bible

Pray Cuz You Trus God

Song fo sing wen you go up to da Temple Fo God, one David kine song

¹ Eh! You Da One In Charge! I no mo one big head, I no ack high makamaka. I no try fo do big kine tings, O tings dat stay so awesome I no can handle.

² I make shua notting bodda me Fo me res inside, Jalike one small kid stay quiet Wen he stay wit his muddah. Inside, I feel jalike dat small kid.

³ You Israel peopo, Wait fo Da One In Charge help you, Cuz you know he goin help you, Now an foeva.