Songs 130 - Hawaii Pidgin Bible

He Tell God Fo Help Him

Song fo sing wen you go up to da Temple Fo God

¹ I feel jalike I down inside da deep watta, Cuz a da trouble I stay in. An from dea, I yell fo you help me, Da One In Charge!

² You da boss fo me, So lissen wat I stay tell! Try lissen real good Cuz I beg you fo help me!

³ Da One In Charge, I know You no make one lis A all da bad tings da peopo do, Cuz if you make one lis lidat, Fo shua no mo nobody Goin stay alive!

⁴ But if peopo tell you fo let dem go An hemo dea shame, You let um go an hemo dea shame. Dass how come peopo Get choke respeck fo you.

⁵ I stay wait, cuz I know Da One In Charge goin do someting. I know wat he tell, an dass why I stay wait fo him help me. An dass why I can hang in dea An trus him.

⁶ I hang in dea an trus my Boss. I feel jalike da army guys Dat guard da town all nite. An dey hang in dea an wait Long time fo day time come,

⁷ All you Israel peopo, Hang in dea An trus Da One In Charge! Cuz if you stay tight Wit Da One In Charge, He erytime stay tight wit his peopo. Wen you wit him, He do wateva he gotta do Fo get you outa trouble.

⁸ Goin be Da One In Charge Dat do wat he gotta do, Fo hemo da shame From da Israel peopo Fo all da bad stuff dey stay do.