Songs 13 - Hawaii Pidgin Bible

Pray Wen You Sore Inside

One David kine Song Fo God fo da main music guy

¹ Eh! You Da One In Charge! You goin bag from me foeva, o wat?! You goin stay huhu an look da odda way?!

² I gotta worry bout all dis stuff, o wat?! An stay sad inside ery day?! Da guys dat stay agains me, Erytime dey goin win ova me, o wat?!

³ Eh! You Da One In Charge! You my God! Try look wass happening, an do someting fo me! Make me come strong one mo time, Cuz no good I jus mahke!

⁴ No good da guys dat stay agains me Talk big an tell, “Eh, we wen smash um good!” No let dem guys pop off An dance an sing cuz dey win.

⁵ But me, I stay trus you, you know. You goin stay tight wit me cuz I yoa guy. Bumbye you goin get me outa trouble, An I goin dance an sing.

⁶ Eh! Da One In Charge, I goin sing to you, Cuz you do plenny good tings fo me.