Songs 128 - Hawaii Pidgin Bible

How Fo Stay Good Inside

Song fo sing wen you go up to da Temple Fo God

¹ All da peopo dat feel jalike dey sked Weneva dey come In front Da One In Charge, An dat live da way he like dem fo live, Dey can stay good inside.

² Den, from da work you do Wit yoa hands, You goin get plenny fo eat. You goin stay good inside, An tings goin go good fo you too.

³ Yoa wife, inside yoa house, Goin be jalike one grape plant Dat give plenny grape. Yoa boys dat sit aroun yoa table, Goin be jalike da keikis Dat grow up aroun da olive tree.

⁴ Dass da kine good tings God stay do, Weneva get one guy dat feel Jalike he sked Wen he come in front Da One In Charge.

⁵ I like Da One In Charge Do good tings fo you, Da One dat stay inside Da Temple on top Mount Zion All da time you stay alive! Wen good tings happen Fo da Jerusalem peopo, I like dat happen to you too!

⁶ I like you see yoa grankids! I like eryting go good Fo da Israel peopo!