Songs 127 - Hawaii Pidgin Bible

Eryting Come From Da One In Charge

Song fo sing wen you go up to da Temple Fo God, one Solomon kine song

¹ Poho da builda guys build one house, An Da One In Charge Not da one dat build um. Poho da security guard, Dat guard da town, An Da One In Charge Not da one dat watch um.

² Ony wase time Wen you guys wake up real early An pau hana real late Fo bus ass fo get food. Cuz you know, God take kea Da peopo he get love an aloha fo, Even wen dey stay sleeping.

³ You know wat? Da One In Charge Give peopo kids, Jalike dey one gif from him. Da ones born from you, Az jalike he give you someting good.

⁴ Da boys dat born wen you still young, Dey goin take good kea a you bumbye. Dey goin be jalike da arrows One army guy carry Fo nobody make any kine to him.

⁵ Any guy dat get plenny boys lidat, He can stay good inside, Jalike one army guy Dat get one bag full a arrows! Bumbye, if get peopo Dat stay agains his kids, An dey poin finga dem In front da town leada guys, Da kids no goin come shame, Cuz dey pono!