Songs 125 - Hawaii Pidgin Bible

No Can Throw Off God Peopo

Song fo sing wen you go up to da Temple Fo God

¹ Da peopo dat trus Da One In Charge, Dey stay solid all da time, Jalike Mount Zion, Dat no move an stay solid.

² Jalike Jerusalem town Get mountains all aroun Fo nobody attack, Da One In Charge no let nobody Attack his peopo, Now, an foeva.

³ Bumbye, maybe one bad kine king Take ova da land Wea da peopo live Dat stay do wass right. But dat kine king No goin stay king long time. Cuz if he stay da king, Maybe da good guys like do Bad kine stuff Fo ovathrow da bad king.

⁴ Eh! You Da One In Charge! Try do good tings Fo da good kine peopo, Da ones dat get One good heart fo do da right ting.

⁵ Da peopo dat go da wrong way An do crooked kine stuff, I like fo Da One In Charge Throw dem out, Same time he kick out da odda peopo Dat do bad kine stuff. But fo da Israel peopo, I like eryting go good fo dem!