Songs 124 - Hawaii Pidgin Bible

God Take Kea His Peopo

Song fo sing wen you go up to da Temple Fo God, one David kine song

¹ Eh, you Israel peopo! Tell me Wat you tink wen happen— But dis neva happen— If Da One In Charge neva stay Oua side befo time, aah?!

² Dey tell, “Eh, If Da One In Charge Neva stay oua side, Dat time odda peopo wen attack us,

³ An come real mad wit us, Den, jalike dey wen eat us alive. But dat neva happen.

⁴ Jalike if da big watta Wen carry us guys away, An jalike if da flash flood Wen get rid a us,

⁵ Jalike if da flood knock us guys down An wipe us out. But dat neva happen.”

⁶ Az why us guys like tell Da One In Charge, “You, you wen do Good tings fo us guys, Cuz you neva let dem guys kill us. Jalike dey wild animals Dat like bite us an kill us!”

⁷ Us guys stay alive still yet, Jalike one bird dat get outa one trap! Jalike da bird catcha guys Put up da trap, But now, da trap broke An we outa dea!

⁸ Da One In Charge, us know Wat kine god him, an he help us. He da One wen make da sky an da world!