Songs 122 - Hawaii Pidgin Bible

Aloha Jerusalem Town

Song fo sing wen you go up to da Temple Fo God, one David kine song

¹ My frenz wen tell me, “Eh, we go da Temple Fo Da One In Charge!” Dat make me stay good inside.

² An now, us guys stay stan Inside da town gates! Awesome, Jerusalem town!

³ Da peopo wen build Jerusalem town, Fo da whole place come All togedda real good.

⁴ Dass da place wea all oua ohanas go, Da ones dat get Da One In Charge Fo dea boss. Dass da Rule from God Bout how us guys gotta go Jerusalem, Fo tell good tings Bout Da One In Charge. We do dis cuz we know Wat kine god him!

⁵ Dass da place wea da king guys sit On top dea thrones fo judge da peopo. Dass da king guys from da David ohana.

⁶ Tell God fo make eryting go good Fo da Jerusalem peopo. Tell dem, “I like fo da one Dat get love an aloha fo you guys Live so no mo worries.

⁷ I like eryting go good Fo da peopo inside yoa town walls I like fo da peopo inside yoa palaces No need worry bout notting!”

⁸ Cuz I love my ohana guys an frenz Dat live Jerusalem, I tell, “I like eryting come good Fo all you Jerusalem peopo.”

⁹ Cuz I love da Temple Fo Da One In Charge, Oua God, I pray dat good tings happen Fo all you guys.