Songs 121 - Hawaii Pidgin Bible

Da One In Charge Take Kea His Peopo

Song fo sing wen you go up to da Temple Fo God

¹ Erytime I look da mountains, I tink: Who goin help me?

² Da One In Charge, He da One dat goin help me, Da One dat make da sky an da world.

³ Da One In Charge, he take kea you, Fo you no fall down. He take kea you, an he no goin sleep.

⁴ Eh! Da One In Charge, He jalike da bodyguard fo da Israel peopo. He no need sleep! He stay awake all da time.

⁵ Da One In Charge, he da One Dat take kea you. He stay right dea nea you, Jalike he make shade Fo da sun no bodda you.

⁶ Day time, da sun no goin hurt you. Nite time, Da moon no goin hurt you too.

⁷ Da One In Charge, he goin take kea you Fo notting bad happen to you. He no goin let you mahke.

⁸ Da One In Charge goin take kea you Ery place you go, From now, an foevas.