Songs 120 - Hawaii Pidgin Bible

One Guy Pray Fo God Help Him

Song fo sing wen you go up to da Temple Fo God

¹ Da One In Charge, Weneva I get trouble, He da one I yell to fo help me. He lissen, an help me.

² Eh! Da One In Charge! Get me outa trouble! Peopo come afta me Fo bulai me an scam me.

³ All you peopo dat talk Jalike you goin scam me, You no tink God goin punish you guys Way mo fo do dat, o wat?!

⁴ God goin punish you guys. Jalike he hurt you Wit da sharp arrows da army guys use, An wit da red hot charcoal from da broom bush!

⁵ Bummahs! I gotta live Far away from my peopo, Jalike I stay wit da no good peopo Meshek side, O jalike I put up one tent Wit da Kedar peopo.

⁶ Too long, I stay Wit peopo dat ony like Fight each odda!

⁷ Me, I da kine guy Dat like tings go good fo erybody. But weneva I talk lidat, Dem guys, dey ony like make war!