Songs 119 - Hawaii Pidgin Bible

Da Rules From God Make Me Stay Good Inside

¹ Da kine peopo Dat nobody can poin finga dem An dat no go da wrong way, Cuz dey follow da Rules From Da One In Charge, Dose peopo can stay good inside!

² Get peopo dat lissen up real good Erytime Da One In Charge Tell um watch out fo someting. Dey stay try fo know him Wit one good heart. Dey da ones can stay good inside!

³ An dey no do bad kine stuff. Dey live da way Da One In Charge Tell um fo live.

⁴ Eh God! You tell us guys wat fo do, An we gotta do um fo real kine.

⁵ Da way I like live, I like stay ready Fo do da tings you tell me Fo do fo you.

⁶ Den, wen I look good at all da tings You tell me fo do, An I do um. I no goin Come shame notting.

⁷ All da time I stay learn How you erytime judge peopo Da right way. Cuz a dat, I no goin hold back Fo tell good tings bout you!

⁸ Wateva tings you tell me I suppose to do, I goin do um! So, no go bag from me!

⁹ Fo one young guy, How he goin make shua He no goin do notting pilau kine, All da time he stay alive? He gotta make shua he do Eryting you tell um fo do! Az how.

¹⁰ Eh God! I go all out fo find you. Eh! No let me get side track From da tings you tell me fo do!

¹¹ Da tings you tell, I keep um inside me, Cuz dey real importan fo me. So den bumbye I no go do notting bad An go agains you.

¹² Eh! You Da One In Charge! I like tell dat you da One Wen do good tings fo me. Teach me how fo do Wat you tell me I gotta do.

¹³ I tell da peopo All da tings you tell cuz you da judge.

¹⁴ Da way you teach me wat fo do, Make me stay real good inside. Az wat make me feel good, Mo den all da rich kine stuffs.

¹⁵ I like tink ova an ova bout da tings You tell me fo do. I like tink plenny bout All da diffren ways you do stuff.

¹⁶ Wen I tink bout da tings You tell me I gotta do fo you, Make me feel real good inside. I no goin foget da tings you tell.

¹⁷ I yoa worka guy. So den, do someting good fo me Fo let me stay alive An I goin do wat you tell me fo do.

¹⁸ Help me fo see an undastan Da awesome tings you teach Inside yoa Rules.

¹⁹ Me, I ony goin live inside dis world short time, you know. So try no hide da tings You tell me fo do.

²⁰ All da time, fo shua I like know Da tings you tell cuz you da judge. Cuz I all bus up inside.

²¹ Da peopo dat ack Jalike dey mo betta den you. You tell um awready dey wrong. Da ones dat no do wat you tell um fo do, Dey goin get kahuna on top dem Cuz a dat.

²² Wen peopo try fo make me come shame An tell me I good fo notting, God, no let dat bodda me! Cuz wen you tell me Fo no do someting, I no do um.

²³ No matta da importan guys Come togedda An talk real stink bout me, Dat no matta, cuz me, I yoa worka guy, I tink plenny bout how fo do Wat I suppose to do fo you.

²⁴ An da tings you tell me watch out fo, Make me feel real good inside, Cuz dey jalike peopo Fo show me wat fo do.

²⁵ I litto mo mahke awready, Jalike I stay lay on da dirt. Try make me strong one mo time, Jalike you wen promise fo do.

²⁶ I wen tell you my life story, An you wen tell me Wass good fo me do. So teach me how fo do Wat you tell I gotta do.

²⁷ Make me undastan How fo live da way you tell me fo live. Fo me tink plenny Bout da awesome kine tings You stay do.

²⁸ I come weak, Cuz I stay sad inside. Make me come strong Jalike you wen promise fo do.

²⁹ No let me bulai nobody. Treat me good an teach me yoa Rules.

³⁰ I make up my mind awready, Dat da way I goin live, You can trus me. I tink all da time Bout da tings you tell Cuz you da judge.

³¹ I stay stick wit da tings you tell. Eh! You Da One In Charge! No let me come shame!

³² Weneva you tell me fo do someting, I goin run fo go do um, Cuz you help me fo undastan stuff Mo betta erytime!

³³ Eh! You Da One In Charge! Teach me how fo live Da way you tell I gotta live. Den, I goin go fo broke An do wat you tell me fo do.

³⁴ Help me fo undastan da Rules you give, So den fo shua I goin do um.

³⁵ Help me fo live Da way you wen tell us guys fo live, Cuz erytime I do stuff dat way, I stay good inside.

³⁶ Give me one heart fo do wat you tell, An not jus fo me come rich.

³⁷ Make shua I no even like look At da wase time kine tings. Give me da real kine life, Da way you wen promise fo do.

³⁸ I yoa worka guy, So den, da tings You wen promise fo do, Do um fo me, Jalike you do um fo all da peopo Dat get plenny respeck fo you.

³⁹ Make da peopo pau talk bad bout me, Cuz good, da way you judge um. But I sked wat goin happen to me If dey ony talk lidat.

⁴⁰ Fo shua, I like do Da tings you tell me fo do. Help me live da kine life dass fo real, Cuz you erytime do da right ting.

⁴¹ Eh! You Da One In Charge! Stay tight wit me, cuz I yoa guy! Get me outa trouble, Jalike you wen tell me you goin do!

⁴² Den I goin know how fo talk back To da peopo dat talk bad bout me, Cuz I stay trus da tings you tell.

⁴³ No hemo from my mout Da stuff I like tell bout you Dass fo real, Cuz you erytime do Wat you tell you goin do. Cuz da stuff you tell cuz you da judge, I trus um.

⁴⁴ I goin do wat yoa Rules tell, Foevas.

⁴⁵ Wea evas I go, I can live how I like, Cuz I go fo broke Fo do da tings you tell me fo do.

⁴⁶ Da tings you tell me fo do, I no mo shame fo talk bout dem In front da king guys!

⁴⁷ Erytime I tink bout all da tings You tell yoa peopo fo do, I do um cuz I get love an aloha fo you. An wen I do um, Make me feel good inside.

⁴⁸ I put my hands up Fo show love an aloha Fo da tings you tell me fo do. I tink plenny bout dat kine stuff.

⁴⁹ I yoa worka guy! So, no foget Da ting you wen tell me, Cuz I stay shua az wat goin happen.

⁵⁰ Weneva I suffa, I know still yet dat wat you tell, goin make me live fo real kine. An dis help me fo no come all bum out.

⁵¹ Da peopo dat ack jalike dey no need lissen you, Dey make fun a me. But dat no make me walk away An leave da Rules you wen give.

⁵² Eh! You Da One In Charge! Weneva I tink bout Da tings you wen tell long time befo time cuz you da judge, Wat you wen tell dat time, Make me no come all bum out.

⁵³ I stay plenny piss off Cuz a da peopo dat stay do wass wrong, An dat no stay tight wit da Rules you wen give.

⁵⁴ I get plenny songs fo sing Bout da tings you tell me I gotta do, No matta wea I stay, hea inside da world.

⁵⁵ Nite time, same ting, I tink plenny bout wat kine god you, Cuz you Da One In Charge. I stay do wat yoa Rules teach.

⁵⁶ I live da way you tell me fo live, Dass wass good fo me fo do.

⁵⁷ Eh God! You wen give me you, Da One In Charge! I promise fo do wat you tell me fo do.

⁵⁸ I go all out fo make you feel good bout me. You get one good heart. Az why I like you do good tings fo me, Jalike you tell you goin do.

⁵⁹ I tink plenny bout da way I do stuff. Az why I change wat I stay do Fo no foget da tings you wen teach.

⁶⁰ I ready fo do wat you tell me fo do. An I do um fas!

⁶¹ Da bad guys, jalike dey come All aroun me fo tie me up, But I no goin foget da Rules you give.

⁶² Late nite time, I get up Fo tell good tings bout you, Cuz weneva you judge peopo, You judge um da right way.

⁶³ Me, I good frenz wit all da peopo Dat feel jalike dey sked Wen dey in front you, An do jalike you tell um fo do.

⁶⁴ Eh! You Da One In Charge! All ova da world, You stay tight wit yoa peopo. Teach me how fo do da tings You tell I gotta do.

⁶⁵ I one guy dat stay work fo you, An you do good tings fo me, Da One In Charge, Jalike you wen tell you goin do.

⁶⁶ Teach me how fo tink good, An fo know wass right an wass wrong, Cuz I trus you Wen you tell me fo do stuffs.

⁶⁷ Befo time you wen punish me Cuz I stay go da wrong way. But now, I do wat you tell me fo do.

⁶⁸ You good, dass why you do good tings. Teach me how fo do Da tings I gotta do.

⁶⁹ Da peopo dat ack Jalike dey no gotta lissen you, Dey bulai plenny Fo make my rep bad. But me, I go all out Fo do wateva you tell me fo do.

⁷⁰ Dey get hard head an stay pupule. But me, wen I lissen yoa Rules, Dat make me come all good inside.

⁷¹ Good fo me, dat you wen punish me, Fo me learn how good Da tings you tell I gotta do.

⁷² Da Rules you teach, dey good fo me, Mo den all da gold an silva dat get.

⁷³ You, da One wen make me! Was you, wen put me togedda. Help me fo undastan Da tings you tell I gotta do.

⁷⁴ Da peopo dat get Awesome respeck fo you, Wen dey see me, dat goin make dem Stay real good inside, Cuz I stay wait fo hear wat you tell.

⁷⁵ Eh! You Da One In Charge! Dis wat I know: Eryting you tell cuz you da judge, Az da right ting. Weneva you punish me, Az cuz dass da right ting fo do.

⁷⁶ So, stay tight wit me cuz I yoa guy, An make me no worries bout notting, Jalike you wen promise me you goin do, Cuz I work fo you.

⁷⁷ Let me know you get pity fo me. Fo me live fo real kine, Cuz yoa Rules make me feel Real good inside.

⁷⁸ Da peopo dat ack Jalike dey no gotta lissen you, Make dem come shame. Dem guys, dey bulai Fo make peopo tink I no good. But me, I goin tink plenny Bout da tings you tell me I gotta do.

⁷⁹ Da peopo dat ack jalike dey sked Wen dey in front you, An dat know wat you teach, Dey goin come back by me.

⁸⁰ Den I goin go all out Fo do wat you tell I gotta do. Cuz a dat, I no goin come shame.

⁸¹ Inside, jalike I litto mo poho Cuz fo long time You no get me outa trouble. I stay wait fo you fo do Da ting you wen promise fo do.

⁸² Jalike my eyes no can see good Cuz I stay wait long time Fo see you do da ting You wen tell you goin do. So! Wen you goin do someting Fo me no need worry?

⁸³ Jalike I one ol goat skin Somebody wen use fo carry wine Dat come all poho cuz stay Too much time inside da smoke, Dass how I feel inside. Still yet, I no foget Da tings you tell I suppose to do.

⁸⁴ I one guy dat work fo you. So, how much time I gotta wait, aah? You da judge. Wen you goin tell Dat da guys dat chase me Goin get punish?

⁸⁵ Da peopo dat ack Jalike dey no gotta lissen you, Jalike dey dig holes Fo trap me inside um. Dey no do notting Da way yoa Rules tell Dey suppose to do.

⁸⁶ All da tings you tell us gotta do, Can trus um, cuz dey true. But dem guys stay come agains me, No matta I neva do notting bad! Eh God! Help me!

⁸⁷ No matta dem guys Almos wipe me out from dis world. I no go way from da tings You tell me I gotta do.

⁸⁸ Cuz you stay tight wit me an I yoa guy, Help me fo stay alive! Den, I goin stay do da tings you teach.

⁸⁹ Eh! You Da One In Charge! Wat you tell, Stay true foeva. An even inside da sky, Wat you tell stay solid.

⁹⁰ Us guys dat stay alive right now Can trus you fo do wat you tell, An da peopo dat goin come From us guys bumbye Can trus you too. You wen set up da world how stay now, An you make um solid.

⁹¹ Da way you set up eryting, Dass how you plan um Fo work fo you.

⁹² Wen I hear da Rules you give, Make me feel good inside. Dass why I neva mahke, No matta I suffa plenny.

⁹³ Wat you tell me I gotta do, I no goin foget um bumbye, Cuz wen I do um, You make me stay alive fo real kine.

⁹⁴ Me, I yoa guy. So den, get me outa trouble! Cuz I like know real good Da tings you tell me I gotta do.

⁹⁵ Da peopo dat do bad kine stuff, Dey make ready fo wipe me out, But I still tink plenny Bout da tings you teach.

⁹⁶ Da way I see um, even da bestes stuff No goin las foeva, But da tings you tell us gotta do, Dey cova eryting.

⁹⁷ Eh! I get love an aloha Fo da Rules you teach! All day, I tink bout um.

⁹⁸ Da tings you tell us guys fo do, Dey make me know mo betta Wat fo do Den da peopo dat stay agains me, Cuz da tings you tell, Stay wit me foeva.

⁹⁹ I undastan stuff mo betta Den all da ones dat teach me. Cuz I tink plenny Bout da tings you teach me An undastan How come you teach lidat.

¹⁰⁰ I undastan stuff Mo betta den my kupunas, Cuz erytime, I tink plenny Fo do da tings you tell me fo do.

¹⁰¹ I stay far away from da bad kine life, Fo me lissen fo do da tings you tell.

¹⁰² I no go da odda way An do diffren kine stuff. But I do da tings you tell Cuz you da judge, Cuz you, you wen show me Da way fo go.

¹⁰³ Da tings you wen promise fo do, Dey good. Fo me, jalike dey taste Mo betta den honey.

¹⁰⁴ Da tings you tell me I gotta do Help me fo undastan all kine stuff. Dass why piss me off Da way some peopo bulai odda peopo.

¹⁰⁵ Da tings you tell, dass jalike one lamp Fo show me wea fo put my feets, Dass jalike one light Dat let me see da road.

¹⁰⁶ I make one strong promise awready, An now I tell dis one mo time, Dat I goin do Wat I wen promise fo do. I goin do da tings dat you tell Stay right, cuz you da judge.

¹⁰⁷ I suffa plenny. Eh! You Da One In Charge! No let me mahke, Jalike you wen tell you goin do.

¹⁰⁸ Eh! You Da One In Charge! I goin talk good bout you, Jalike dass one sacrifice Dat I like make fo you Fo make you feel good inside. Try teach me da tings you tell Cuz you da judge.

¹⁰⁹ All da time, I no stay shua If I goin mahke, Still yet, I no foget yoa Rules.

¹¹⁰ Da bad guys, jalike dey make one trap Fo catch me. But dat no throw me off, Fo do da tings you tell me I gotta do.

¹¹¹ Da tings you teach, Dey goin stay wit me all my life, Cuz dey da tings dat make me Stay real good inside.

¹¹² I make up my mind awready, Fo do wateva you tell I gotta do, Till I mahke.

¹¹³ I hate da kine peopo Dat no can make up dea mind! But I get love an aloha Fo wat you teach.

¹¹⁴ You, you jalike one place I can hide. You jalike one shield fo me. I stay wait fo you do Wat you wen promise fo do.

¹¹⁵ All you peopo dat stay do bad kine stuff, Get away from me! Cuz I goin do da tings Dat my God tell me I gotta do.

¹¹⁶ Help me fo no fall down, Jalike you wen promise fo do, So I no mahke! I stay wait fo you get me outa trouble, So I no come shame.

¹¹⁷ Help me fo stan up, Fo me get outa trouble. Let me tink ova an ova Bout da tings you tell I suppose to do.

¹¹⁸ All da peopo dat go da wrong way An no like do da tings You tell dey suppose to do, You no like do notting wit dem. Cuz dey like bulai peopo Jus cuz dey like do um.

¹¹⁹ Da peopo inside da world Dat stay do bad kine stuff, You treat um jalike dey rubbish. Dass why I get love an aloha Fo da tings you tell me ova an ova.

¹²⁰ I come all sked an shaking All ova my body wen I tink bout you, Cuz you da Judge. An I sked you goin punish me Fo no do wat you tell was right.

¹²¹ I wen do wass right Jalike you tell I suppose to do Cuz you da judge. No go way from me an leave me, Cuz if you do dat, Da peopo dat presha me, Goin hurt me.

¹²² I yoa worka guy, So den, tell me dat garans eryting Goin go good fo me. Da peopo dat ack Jalike dey no need lissen you, No let dem presha me.

¹²³ You wen promise fo do Da right ting fo me, But I real tired fo wait Fo you get me outa trouble.

¹²⁴ I yoa worka guy, an you promise Fo stay tight wit me, So den, treat me da way you wen tell You goin treat me. Teach me how fo do da tings You tell I gotta do.

¹²⁵ I yoa worka guy. Az why I tell, help me fo undastan, Fo me learn da tings you teach.

¹²⁶ Eh! You Da One In Charge! You gotta do someting now, Cuz get guys dat stay broke yoa Rules.

¹²⁷ Fo shua, I get love an aloha Fo da tings you tell us guys We gotta do. Dass mo plenny love an aloha Den I get fo da bestes kine gold.

¹²⁸ Dass why all da tings you tell I gotta do, I know fo shua, dey right. An I hate wat peopo do Wen dey bulai odda peopo.

¹²⁹ Da stuff you teach, real awesome! Dass why I do um Da same way you teach um.

¹³⁰ Wen peopo hear da tings you tell, Eryting come clear fo dem, Jalike get light. An dat help da peopo Dat donno wat fo do Undastan wat fo do.

¹³¹ I all excited fo know Da tings you tell us guys we gotta do, Jalike one dog pant fo watta.

¹³² Eh! Tink bout me, an make good to me! Cuz dass how you do erytime Fo da peopo dat know wat kine god you. An dass why dey get Love an aloha fo you.

¹³³ Make shua wen I walk, I no fall down, Jalike you wen make One promise fo do. No let da bad kine peopo take ova me.

¹³⁴ Proteck me from da peopo Dat presha me, Fo me do all da tings You tell me I gotta do.

¹³⁵ Try look at me an smile Cuz I yoa worka guy, An teach me how fo do Da tings you tell I gotta do.

¹³⁶ I cry real plenny, Jalike get ditch watta Stay come outa my eyes. Cuz get peopo dat no do Wat yoa Rules tell.

¹³⁷ Eh! You Da One In Charge! You erytime do da right ting! Da tings you tell cuz you da judge, Dey pono!

¹³⁸ Wen you tell us guys wat fo do, You teach us da right tings fo do. An us guys can trus you bout all dat.

¹³⁹ Da ones dat stay agains me, Dey foget eryting you tell. An dat make me real mad, Az why I no can even talk!

¹⁴⁰ Da tings you promise, Can trus um fo real. Cuz peopo wen tes um out Plenny awready. I yoa worka guy, An I get love an aloha Fo da tings you tell!

¹⁴¹ Nobody look me az importan, An peopo tink I good fo notting, But I no foget da tings You tell me fo do.

¹⁴² You do da right tings erytime. Da Rules you teach, can trus um.

¹⁴³ I get plenny trouble An stay plenny sore inside. But da tings you tell me fo do Make me feel real good inside.

¹⁴⁴ Da tings you teach me fo do, Stay right foeva. Help me fo undastan um, Fo me stay alive.

¹⁴⁵ I go all out fo yell fo you help me. Eh! You Da One In Charge! Do someting! Help me fo do wat yoa Rules tell!

¹⁴⁶ I yell fo you get me outa trouble, Fo me do da tings you teach.

¹⁴⁷ Befo da light come morning time, I yell fo you help me. Den I stay shua you goin tell me Wat I need fo hear.

¹⁴⁸ Nite time, my eyes stay open Fo me tink plenny Bout da tings You wen promise fo do.

¹⁴⁹ Eh! You Da One In Charge! You stay tight wit yoa peopo, So den, lissen wat I stay tell you. You judge da right way, So help me fo stay alive.

¹⁵⁰ Da peopo dat like do pilau kine stuff, Dey come nea me. But dey stay far from yoa Rules.

¹⁵¹ But you, Da One In Charge, You stay nea me too, An all da tings you tell I gotta do, Stay pono.

¹⁵² Befo time I wen hear da tings you teach. From dat, I wen learn Dat you make da tings you teach, Stay solid foeva.

¹⁵³ Try look at all da stuff Dat make me come sore inside, An get me outa trouble. Cuz I no foget da Rules you teach.

¹⁵⁴ Back me up an tell da judge fo let me go. Let me stay alive, Jalike you wen promise fo do.

¹⁵⁵ No way you goin get da peopo Dat do wass wrong outa trouble, Cuz dey no like fo know Wat you tell dey gotta do.

¹⁵⁶ Eh! You Da One In Charge! You show all kine pity. You judge da right way, So help me fo stay alive.

¹⁵⁷ No matta get plenny peopo Dat go afta me an give me hard time, I no turn away From da tings you teach me fo do.

¹⁵⁸ Get peopo dat tell, dey my frenz, But dey ony tell dat fo bulai me, An dey no like do Notting you like teach um. Piss me off plenny, dat!

¹⁵⁹ Eh! You Da One In Charge! Try look how I get love an aloha Fo da tings you tell me fo do! You stay tight wit yoa peopo erytime, An I yoa guy, so keep me alive!

¹⁶⁰ All da tings you tell, Stay true fo real! Eryting you tell stay right, An stay foeva, cuz you da judge.

¹⁶¹ Get importan peopo dat come afta me, No matta I neva do notting bad. But da ting dat make me sked An shaking inside, Dass da tings you tell!

¹⁶² Me, I stay real good inside Cuz I know wat you wen promise fo do. Dat make me feel Jalike I find one big treasure.

¹⁶³ Weneva peopo bulai somebody, I hate dat, an bodda me plenny. But I get love an aloha Fo da Rules you teach.

¹⁶⁴ Ery day, seven time I tell, “You da greates!” Cuz erytime you tell Wass right o wass wrong, az pono!

¹⁶⁵ Fo da peopo dat get love an aloha Fo da Rules you teach, Eryting go real good fo dem. No mo notting goin jam um up!

¹⁶⁶ Eh! You Da One In Charge! I stay wait fo you get me outa trouble. Da tings you tell me fo do, I do um.

¹⁶⁷ I go all out do da tings you teach. Dass wat I get plenny love an aloha Fo do.

¹⁶⁸ Eryting you tell me fo do, I do um, Eryting you stay teach, I do um, Cuz eryting I do, I do um in front you.

¹⁶⁹ Eh! You Da One In Charge! Wen I yell fo help, I like you lissen wat I tell. I like fo you help me undastan stuff, Jalike you wen make One promise fo do.

¹⁷⁰ Wen I tell you fo do someting fo me, I like you lissen. Get me outa trouble, Jalike you wen promise fo do.

¹⁷¹ Help me fo tell how awesome you stay, Cuz you teach me da tings I gotta do.

¹⁷² Wen you make one promise, Dat make me like Tell erybody bout um! Cuz eryting you tell me fo do, Az da right ting fo do!

¹⁷³ I like you use yoa powa fo help me! Cuz da tings you tell me fo do, Dass wat I make up my mind fo do.

¹⁷⁴ Eh! You Da One In Charge! Fo long time, I wait an wait Fo you get me outa trouble! An you know wat make me Stay good inside? Da Rules dat you teach!

¹⁷⁵ Keep me alive! Den, I goin tell good tings bout you. An da tings you tell cuz you da judge, Dat goin help me.

¹⁷⁶ Jalike one lost sheep Dat donno wea he going, I wen go da wrong way. So, try come an find me, yoa worka guy, Cuz I no foget da tings You tell me fo do.