Songs 115 - Hawaii Pidgin Bible

Da Ony God Dat Tell Da Trut

¹ Eh! You Da One In Charge! No need fo somebody Tell good tings bout us guys. Mo betta, peopo tell good tings Bout wat kine god you! Cuz you da One dat do Awesome kine stuff! Cuz you stay tight wit yoa peopo, An you da kine God Dat us guys can trus.

² How come da odda peopos tell, “Eh! Wassup wit dat God Dem guys pray to, aah?”

³ Dis how stay wit oua God: He live inside da sky An he do wateva he like do.

⁴ Da idol kine gods Dat da odda peopos pray to, Dey ony statues dat peopo make Outa silva an gold.

⁵ Dey get mout, but dey no can talk. Dey get eye, but dey no can see.

⁶ Dey get ear, but dey no can hear. Dey get nose, but dey no can smell.

⁷ Wit dea hands, dey no can feel notting. Wit dea feets, dey no can walk. Dey no can even make noise Inside dea throat.

⁸ Da peopo dat make idol kine gods, Dey goin come jalike dose gods. Same ting fo all da peopo Dat stay trus dat kine gods.

⁹ Eh! You Israel ohana peopo! Trus Da One In Charge! He da One dat help you guys. He da One dat make shua You guys no get hurt.

¹⁰ Eh! You pries guys Dat come from Aaron! Trus Da One In Charge! He da One dat help you guys. He da One dat make shua You guys no get hurt.

¹¹ Eh! All you peopo dat feel Jalike you sked Wen you in front Da One In Charge! Trus Da One In Charge! He da One dat help you guys. He da One dat make shua You guys no get hurt.

¹² Da One In Charge, he no foget us guys. He do good tings fo us guys. He do good tings Fo all da Israel ohana peopo, Fo da pries guys dat come from Aaron, An all da odda guys too.

¹³ Da One In Charge do good tings Fo da peopo dat feel sked Wen dey come in front him, No matta dey no stay importan, O dey stay importan, same ting.

¹⁴ I like fo Da One In Charge Give all you guys plenny kids, You guys, an all yoa kids too.

¹⁵ Da One In Charge, Da One dat make da sky an da world. I like fo him give you guys da powa Fo do eryting he wen like you fo do Wen he make you.

¹⁶ Da sky, an eryting up dea, Dass fo Da One In Charge. But da world, He wen give dat to da peopo.

¹⁷ Da mahke peopo, no way dey goin tell Good tings bout Da One In Charge, Cuz down dea, nobody make noise!

¹⁸ But us guys, we stay alive! We goin tell good tings Bout Da One In Charge Now an foevas! Eh! You guys! Tell good tings Bout Da One In Charge!