Songs 114 - Hawaii Pidgin Bible

Song Bout Da Time Da Israel Peopo Come Outa Egypt

¹ Da Israel peopo, dey da ones From Jacob ohana— Wen dey come outa Egypt, An bag from da Egypt peopo Dat talk diffren kine language,

² Was den dat dose Judah ohana peopo Come spesho fo God An dose Israel peopo get God Fo stay in charge a dem.

³ Was jalike da Red Sea wen see dem Coming, an run away! Jalike da watta inside da Jordan Riva Wen turn roun An go back mauka side!

⁴ Da mountains wen jump aroun Jalike dey sheeps an dey sked, An da hills wen move fas Jalike dey bebe sheeps dat run away.

⁵ Eh! So, you, Red Sea, tell me dis: How come you so sked, You wen run away?! Eh you! Jordan Riva, tell me dis: How come you so sked, You wen turn aroun?!

⁶ Eh! You mountains, How come you so sked, You wen jump jalike da sheeps?! Eh! You hills, How come you so sked, You wen move fas Jalike da bebe sheeps?!

⁷ Eh you! Earth! Weneva da Boss show up, You betta shake! Cuz he da God dat Jacob wen pray to.

⁸ Dat God, he da One wen make Watta pools come outa da big rocks, An pukas fo watta come outa da cliffs.