Songs 113 - Hawaii Pidgin Bible

Tell Erybody Dat Da One In Charge, He Good!

¹ Eh you guys! Tell good tings Bout Da One In Charge! All you guys dat work Fo Da One In Charge, Tell good tings bout him! Tell good tings cuz you know Wat kine god him!

² I like fo peopo tell dat Da One In Charge Do good tings Now, an foevas, Cuz dey know who him.

³ All ova, from da place da sun come up To da place da sun go down, Good fo tell how good Da One In Charge stay!

⁴ He mo big den all da diffren peopos. Da One In Charge, he da greates, He mo big den even da sky!

⁵ No mo nobody jalike Da One In Charge, Da One dass da God fo us guys! He get his throne ova eryting,

⁶ But he bend down fo see Wass happening inside da sky An da earth.

⁷ Da peopo dat no can do notting, Da One In Charge pick dem up Outa da dirt. Da peopo dat get hard time, He help dem fo stan up An come outa da rubbish pile.

⁸ Da One In Charge give dem One place wit da alii, Right dea wit da leada guys Fo all his peopo.

⁹ Da One In Charge make da wahines Dat no can get kids stay good inside, Cuz he give um dea home, An now dey get kids. Eh you guys! Tell good tings Bout Da One In Charge!