Songs 112 - Hawaii Pidgin Bible

Wat Da Good Kine Peopo Do

¹ Eh you guys! Tell good tings Bout Da One In Charge! Anybody dat get choke respeck Fo Da One In Charge, An fo shua like do Wateva Da One In Charge tell um fo do, Dey goin stay real good inside.

² Da peopo dat come from dose guys, Goin be da mos strong peopo Inside da land. God goin do good tings fo dem Cuz dey stay do wass right.

³ Dea ohana get plenny stuff, an dey rich. An cuz dey do da right ting erytime, Good tings goin happen to dem All da time.

⁴ Fo da peopo dat do wass right, An give odda peopo chance, an pity dem, An do da right ting, God get dat kine peopo outa trouble, Jalike wen stay dark all aroun, Da light come out.

⁵ Wen somebody do good tings fo peopo An lend stuff to dem, Good tings goin happen fo dat guy. He no goin bulai nobody Jus fo make money.

⁶ Fo dat kine guy, no mo notting Goin throw him off. Fo anybody dat do da right ting erytime, Peopo no goin foget dem foeva.

⁷ Dey no come sked wen dey hear Bad kine stuff stay happening. Inside, dey stay solid, An trus Da One In Charge.

⁸ Dat kine guy no come sked, Cuz inside he stay solid. He know dat he goin face Da ones dat stay agains him, An he goin be da winna.

⁹ Da good kine peopo Stay give good kine stuff To da pooa peopo all ova da place. An cuz dey do da right ting erytime, Good tings goin happen to dem foeva. Peopo goin respeck dem, An cuz a dat, dey goin come Mo an mo strong.

¹⁰ Da bad guys, dey see wass happening, An dey come bum out. Dey goin grind dea teet Cuz dey so mad an futless. Eryting fo dem goin come poho. Eryting da bad kine peopo like get, No goin come to dem!