Songs 111 - Hawaii Pidgin Bible

Tell Good Tings Bout Da One In Charge!

¹ Eh you guys! Tell good tings Bout Da One In Charge! Weneva da peopo dat stay do wass right Come togedda, I goin go all out fo tell How awesome Da One In Charge stay.

² Real importan, all da tings Da One In Charge stay do. Da peopo dat stay good inside Cuz a da tings Da One In Charge do, Good dey try fo undastan Wat he stay do.

³ Da kine tings Da One In Charge stay do, Show how awesome him, An how plenny respeck Peopo get fo him. He erytime stay do Da right ting fo peopo.

⁴ He make shua nobody foget Da awesome kine tings he do. Da One In Charge, He like do good tings fo peopo An show pity fo dem.

⁵ He give food to da ones Dat feel jalike dey sked Wen dey come in front him. He no foget da deal he wen make Wit his peopo.

⁶ Da One In Charge show his peopo How plenny powa he get fo do stuff, Cuz he wen take away da land From odda nations Fo give um to us guys.

⁷ Eryting Da One In Charge do, You can trus um, An you know he get da right fo do um. Eryting he tell you gotta do, Fo shua, good fo you do um.

⁸ Wateva Da One In Charge tell you Fo shua no goin change, eva. You can trus wateva he do, Cuz he do da right ting erytime.

⁹ He wen do wat he gotta do Fo get his peopo outa trouble. He wen tell dat Da deal he wen make wit dem, Goin stay foeva. Wen you know wat kine god him, You know dat he stay good an spesho, An you know you betta Come sked a him.

¹⁰ If you come sked wen you tink Bout who Da One In Charge, Cuz you get plenny respeck fo him, Den you ready fo start Fo learn wat fo do. Erybody dat stay do Wat Da One In Charge tell um fo do, Dey can undastan stuff fo real kine. Good, dat erybody tell all da time Dat Da One In Charge, he da greates!