Songs 108 - Hawaii Pidgin Bible

One David kine Song Fo God

¹ Eh God! Inside I stay solid! I stay solid inside! I all ready fo sing An go all out fo make music!

² I like my bass harp An small harp come alive! An use um fo sing Befo da sun come up.

³ You Da One In Charge, I goin tell all da diffren peopos Dat you da greates! I goin make music fo you, So fo shua, All da diffren countries goin hear!

⁴ You get one big heart Fo stay tight wit yoa peopo, Mo big den get sky up dea! You da kine God us guys can trus plenny, Jalike get plenny clouds inside da sky!

⁵ God, I like erybody tell, Dat you even mo big den da sky! I like erybody on top all da earth know How awesome you stay!

⁶ So, fo da peopo you get love an aloha fo, I like you get dem outa trouble! You get plenny powa, So do someting fo help dem.

⁷ God stay inside da place Dat stay spesho fo him, An he tell dis: “I goin feel real good inside Wen I take ova da Shekem town lands An measure da Sukkot Valley lands Fo give um to my peopo.

⁸ Gilead side, all dat land stay mines, Manasseh side, same ting. Efraim side, my army guys Goin come from dea. Judah side, dass wea my king guys Goin come from.

⁹ Da Moab peopo, dey goin do Da garut kine work fo me, Da Edom peopo goin be slaves Fo take off my slippas. I goin yell cuz I da winna An I stay good inside Wen I take ova da Filisha land!”

¹⁰ So! Who goin take me to da Edom land? Who goin show me da way fo go Dea big town dat get strong wall?

¹¹ God, you da One dat gotta do dat, No matta was you dat wen throw out Us guys befo time, An you no stay go Wit oua army guys now, Wen dey go out fo fight!

¹² Go help us guys out, Fo win ova da ones dat stay agains us! Wase time, fo tink Dat odda peopo can get us outa trouble. Ony you can!

¹³ Cuz a God, us guys goin be da winnas! He da One goin knock down Da ones dat stay agains us!