Songs 107 - Hawaii Pidgin Bible

Book Numba Five ( Songs 107–150 ) God, He Good

¹ Eh you guys! Tell good tings Bout Da One In Charge, cuz he good, An he stay tight wit his peopo foeva!

² Da peopo dat Da One In Charge Wen get outa trouble, I like fo dem tell How he get um outa trouble, Fo da peopo dat stay agains dem No hurt dem.

³ God wen bring his peopo back togedda From all da diffren countries Wea dey stay, From wea da sun come up To wea da sun go down, From da north side An from da south side.

⁴ Some a dem go all ova da boonies Cuz dey donno wea dey was going. Dey no can find one town Fo make house dea.

⁵ Dey stay hungry an thirsty. Dey feel inside Jalike dey litto mo mahke.

⁶ Da peopo wen yell to Da One In Charge Fo him help dem, Cuz was real hard fo dem, An he get um outa trouble.

⁷ He make dem go da right way Fo reach one town fo make house.

⁸ Good, dose peopo tell good tings Bout Da One In Charge, Cuz he stay tight wit his peopo, An cuz he do Awesome kine stuff fo erybody.

⁹ Cuz Da One In Charge Give da thirsty peopo wat dey need. He fill up da hungry peopo Wit good kine stuff.

¹⁰ Some a dem stay inside real dark places Fo dem mahke. Dey prisonas dat stay suffa Cuz dey all tie up wit iron chain.

¹¹ Az cuz dey wen go agains Da tings God tell um fo do. Da God Dass Mo Importan Den All Da Odda Gods Wen tell dem wass good fo dem do. But dey ack jalike Da One In Charge Donno notting!

¹² Az why God wen make dem lose fight, Cuz dey gotta bus ass Fo odda peopo. Jalike dey trip an fall down, An no mo nobody dea fo help dem.

¹³ Den, wen eryting come real hard fo dem, Dey wen yell fo Da One In Charge Help dem, An he get dem outa trouble.

¹⁴ God bring dem outa da real dark places. He broke da chains dat stay tie um up.

¹⁵ Good, dose peopo tell good tings Bout Da One In Charge Cuz he stay tight wit his peopo, An he do awesome kine stuff Fo peopo all ova da world.

¹⁶ God wen smash da bronze metal town gates An cut da iron bars.

¹⁷ Some a dem wen come stupid An get one attitude, Cuz dey like beef wit God, An cuz dey stay do Any kine bad kine stuff, Plenny trouble come to dem cuz a dat.

¹⁸ Hard fo dem eat even litto bit, Az why dey come Jalike dey litto mo mahke.

¹⁹ Den, wen eryting come hard fo dem, Dey wen yell to Da One In Charge Fo help dem, An he get um outa trouble.

²⁰ An wat Da One In Charge tell um, Make um come good Fo dem no mahke An go down inside da grave.

²¹ Good, dose peopo tell good tings Bout Da One In Charge Cuz he stay tight wit his peopo, An he do awesome kine stuff Fo peopo all ova da world.

²² Good dey make one sacrifice Fo tell God “Mahalo!” An tell da story Bout all da tings God stay do. Good dey yell Cuz dey stay good inside!

²³ Some a dem wen go Inside da ocean in big boats. Dey get jobs on top da watta Dat take um all ova da world.

²⁴ Dey see wat Da One In Charge Do ova dea, Da awesome stuff he do On top da open ocean.

²⁵ God jus tell someting, An he bring up one storm wind Dat make da ocean waves Come real big.

²⁶ Da boats go jalike up to da sky, An down to da bottom, Cuz get real danger, An da saila guys no can handle.

²⁷ Dey fall all ova da place An stagga jalike dey piloot. Dey donno wat fo do. No matta dey good sailas, Dat no help um.

²⁸ Den, wen eryting real hard fo dem, Dey yell fo Da One In Charge Help dem, An he get dem outa trouble.

²⁹ He make da storm stop An make da watta come glassy An make da waves come flat.

³⁰ Wen da waves come flat, Da peopo come good inside. Den God bring um to da harbor Wea dey like go.

³¹ Good, dose peopo tell good tings Bout Da One In Charge Cuz he stay tight wit his peopo, An he do awesome kine stuff Fo peopo all ova da world.

³² Good dey tell how importan Da One In Charge Wen all da peopo come togedda! Good dey tell dat God da greates Wen dey meet wit da older leadas!

³³ God change rivas fo come one dry place wea no mo notting. He make pukas wea da watta come outa da groun Come one place dat need watta cuz no moa.

³⁴ God make da kine land dat grow plenny fruits Come all mud, Cuz da peopo dat live dea do bad kine stuff.

³⁵ God make da dry boonies get watta pond all ova, An da land wea no mo rain get pukas wea da watta come out.

³⁶ Dass da place God wen bring hungry peopo fo live dea An set up one town fo dem make house.

³⁷ Da peopo wen throw seed on top da fields An plant grape farms. Dass how dey get plenny fo eat.

³⁸ God do good tings fo dem, An dey come choke plenny peopo. God no cut down da numba a dea animals.

³⁹ But den, da peopo come litto bit. Dey no stay importan no moa, Cuz dey get hard time. Odda peopos presha dem. An do bad kine tings to dem, An da peopo stay sad inside.

⁴⁰ God show dea alii guys, Da ones dat put presha on da peopo, Dat dea alii guys no worth notting, He make da alii guys go hea an dea Inside da boonies, wea no mo road.

⁴¹ But God make shua da ones Dat need plenny stuff, come okay An no get hard time no moa. He make dea ohanas come mo plenny, Jalike how da sheeps an goats Come plenny.

⁴² Wen da good kine peopo see dat happen, Dey stay good inside. But da bad kine peopo No can tell notting.

⁴³ Da peopo dat know wat fo do erytime Good dey stay do all dis stuff, An tink plenny bout how God stay tight wit his peopo!