Songs 105 - Hawaii Pidgin Bible

God Take Kea His Peopo Tell Da One In Charge He Da Greates Fo Eryting He Wen Do

¹ Tell Da One In Charge Dat he da greates! Pray to him Cuz you know wat kine god him. Tell all da diffren peopos Da tings he wen do.

² Sing fo him, Make music fo him. Tell ova an ova All da awesome kine tings he do!

³ Talk big bout him Cuz you know wat kine god him, An you know he stay good an spesho. All da peopo dat try fo know Da One In Charge fo real kine, I like fo dem stay good inside.

⁴ Try go find out wat Da One In Charge Like you fo do, Cuz den he goin make you strong inside. All da time, try fo come mo nea him.

⁵ No foget all da kine tings he wen do Dat us guys no can do, Wen he do all kine unreal kine stuffs, An wen he judge da peopo.

⁶ Lissen up, you peopo Dat come from Abraham: Abraham da one dat get God fo his boss! Lissen up, you guys dat come from Jacob, He da one dat Da One In Charge wen pick!

Da Deal God Make Wit Abraham, Isaac, An Jacob

⁷ Dass him, Da One In Charge! An he oua God. Wat he tell cuz he da judge Stay true all ova da world.

⁸ All da time he no foget Da deal he wen make. Fo one tousan generation He tell how gotta be.

⁹ Az da deal he wen make wit Abraham, Da strong promise he make to Isaac.

¹⁰ He make da same deal solid fo Jacob, Da one dat get da name Israel too. Az da deal dat goin stay foeva,

¹¹ Cuz God tell Jacob, “I goin give you Da Canaan land foeva! Az da land I wen pick Fo come yoa kids property.”

Da Odda Ancesta Guys

¹² Had one time, Oua ancesta guys ony was litto bit, Fo real, neva get plenny a dem dat time, An dey no mo da rights Fo da land wea dey live.

¹³ Dey go by dis peopo an dat peopo, From one land to da odda land, From one king to anodda king.

¹⁴ God no let nobody make any kine To his peopo. Cuz dass his peopo, He even punish king guys.

¹⁵ He tell, “No even touch Da peopo I wen pick! No hurt da guys dat talk fo me!”

Joseph

¹⁶ Da One In Charge wen make um Fo no mo enuff fo eat All ova da Canaan land. He wen jam up eryting Dey plant fo eat.

¹⁷ But befo God do dat, He wen sen one guy Egypt side Fo help da Israel ohana. Az was Joseph, Da one dey wen sell Fo come one slave.

¹⁸ Ova dea, da peopo wen make Any kine to Joseph. Dey throw him inside da prison Wit leg chain on top his feets An one iron band aroun his neck.

¹⁹ Laytas, Joseph tell bout someting Dat goin happen bumbye, An da ting happen. Da ting Da One In Charge Wen tell Joseph Show proof dat Joseph tell da trut.

²⁰ Da Egypt king, Dat stay in charge a plenny diffren peopos, He sen somebody Fo open da door fo Joseph, An let um outa prison.

²¹ Den da king put Joseph In charge a his govmen An all da stuffs he get.

²² Az how Joseph get powa Ova da king helpa guys, Fo do howeva he like. He teach da older guys Dat work fo da king Fo know wat dey gotta do.

Da Israel Peopo Egypt Side

²³ Afta dat, Joseph faddah Israel Go Egypt side. He live ova dea wit da Egypt peopos Dat come from Ham, No matta he not from dea.

²⁴ Da One In Charge Make his peopo come choke plenny. He make um come strong, Cuz dey mo plenny den all da peopo Dat stay agains dem.

²⁵ Den Da One In Charge Make da Egypt peopo change dea mind Fo hate da Israel peopo Dat spesho fo him. Dey make sly kine plan fo jam up Da ones dat get God fo dea boss.

Moses An Aaron, An How God Wack Da Egypt Peopo

²⁶ God sen Moses, Da guy dat work fo him, An Aaron, da guy God wen pick.

²⁷ Dey do awesome tings Fo show da Egypt peopo who God. Dey do unreal kine tings Inside da land wea da Ham peopo live.

²⁸ God make eryting come dark All ova da land, Cuz da Egypt peopo go agains Wat God tell um fo do.

²⁹ God wen make all dea watta Come blood, An make da fish mahke.

³⁰ All ova dea land, get frogs ery place, Dey even go inside Da king palace bedrooms!

³¹ God tell fo plenny flies come, An dey come, da kine dat bite. Den come gnats From one side a da country To da odda side.

³² Da rain, God make um come hail From da sky. Had lightning all ova dea land.

³³ God wen wack Dea grape vines an fig trees, An smash da odda trees All ova da land.

³⁴ God tell fo da locust come, An dey come, an da grasshoppa too, Mo plenny den can count.

³⁵ Da bugs eat up All da green plants inside dea land. Dey eat up da fruits dat stay grow too.

³⁶ Den he wipe out All da numba one boys Inside dea land, Da spesho ones, Dat was goin make dea peopo strong.

Outa Egypt To Da Boonies

³⁷ God wen take da Israel peopo outa dea, Wit plenny silva an gold. From all da Israel ohanas, Neva have nobody dat no can go.

³⁸ Da Egypt peopo, dey feel good Wen da Israel peopo go way, Cuz dey wen come sked A da Israel peopo.

³⁹ God wen spread out one cloud Fo cova dem, day time, An he give um one fire fo shine light, Nite time.

⁴⁰ Da peopo wen aks fo food, An God bring um quail birds. He give um bread from da sky Dass nuff fo erybody.

⁴¹ God open up one big rock An plenny watta come out Jalike one riva, No matta stay dry all aroun.

⁴² Cuz God no foget da promise He wen make to Abraham, An cuz God stay good an spesho, An he da boss fo Abraham.

Da Land God Tell He Goin Give Da Peopo

⁴³ Wen God bring his peopo outa Egypt, Dey stay real good inside. Da peopo he wen pick was shouting Cuz dey feel good inside.

⁴⁴ God wen give his peopo da land Wea odda peopos wen live befo time. Da odda peopos wen work da groun, But his peopo take um ova.

⁴⁵ You know how come God give um all dat? Az fo dem do Wat he tell um dey gotta do, An fo dem take in wat he teach, An do um. Eh erybody! Go tell good stuff Bout Da One In Charge!