Songs 103 - Hawaii Pidgin Bible

Love An Aloha Fo God Peopo

One David kine Song Fo God

¹ I tink lidis: “Tell erybody dat Da One In Charge, He da One give me Da powa fo do eryting!” Eryting inside like tell Wat kine god him, Da One dat stay good an spesho!

² I tink lidis: “Tell erybody dat Da One In Charge, He da One give me da powa Fo do eryting!” An I no goin foget All da good tings he do fo me.

³ He da One dat let you go An hemo da shame fo da bad tings you wen do. He da One dat make you come good, Erytime you stay sick.

⁴ He da One dat buy back yoa life Fo you stay inside his ohana An no mahke an go Inside da Deep Dark Hole. He da One dat stay tight wit you Cuz you stay his guy, Jalike he put one crown on top yoa head Wit love an aloha.

⁵ Da One In Charge give you Da stuff dat make you feel good inside, Cuz he do plenny good tings fo You. No matta you litto mo ol now, He make you come Jalike one young guy one mo time, Jalike one eagle.

⁶ Wat Da One In Charge do Erytime stay right. Wen somebody take away Da rights from odda peopo, God, he da judge Dat know da right ting fo do.

⁷ Befo time, God let Moses know How he ack fo real kine, He let da Israel peopo know Wat he stay do.

⁸ Da One In Charge, He get plenny pity fo peopo, An he like do good tings fo dem. He no come huhu real fas. He get plenny love an aloha Fo stay tight with his peopo.

⁹ Still yet, God no goin poin finga Us guys foeva, He no goin stay huhu foeva too.

¹⁰ God get da right fo punish us guys Cuz we do bad kine stuff— But he no make lidat. He get da right fo pay us guys back, Cuz we wen go agains him— But he no go afta us.

¹¹ You know how far da earth to da sky? Dass how plenny love an aloha God get fo us guys, Fo stay tight wit da peopo Dat get choke respeck fo him!

¹² You know how far Da place da sun come up To da place da sun go down? Dass how far God Wen awready take away da shame Fo da tings us guys wen do agains him!

¹³ Jalike one faddah guy Show choke plenny aloha fo his kids, Dass how plenny aloha Da One In Charge get Fo da peopo dat get respeck fo him!

¹⁴ Cuz Da One In Charge, he know How he wen make us guys. He no foget dat us ony dus.

¹⁵ Da peopo, dey live ony short time, Jalike da grass. Dey no stay long time. Jalike wen da wild flowa come out,

¹⁶ An den da wind blow litto bit, An no mo da flowa. An even da place Wea da flowa wen grow, Nobody rememba.

^17-18 But Da One In Charge, He stay tight wit his peopo From long time befo time, An till long time from now, Da ones dat get choke respeck fo him. Da peopo dat stick wit da deal God wen make, An no foget fo do Da tings he wen tell um fo do, He goin do wass right fo dem An fo dea kids an grankids too!

¹⁹ Da One In Charge, He wen put his throne inside da sky, An he da One dat stay in charge A eryting an erybody!

²⁰ All you angel messenja guys Dat work fo Da One In Charge, Tell how Da One In Charge da One Dat make you come Wat he like you fo come! Da One In Charge wen make you guys, An make you real strong, An you guys lissen him An go do eryting he tell you fo do.

²¹ All you army guys from da sky Dat fight fo Da One In Charge, Tell how he da One Dat make you come Wat he like you fo come! You guys work fo Da One In Charge, An you do wateva he like you fo do.

²² All da tings Da One In Charge wen make, Ery place wea he stay in charge, Tell how Da One In Charge da One Dat make you come Wat he like you fo come! An me, I tink same ting: “I like tell erybody Dat Da One In Charge, He da One dat make me come Wat he like me fo come!”