Songs 101 - Hawaii Pidgin Bible

Da King Make One Promise To God

One David kine Song Fo God

¹ I goin stay tight wit you, Da One In Charge, An I goin judge peopo da right way. Dass wat I stay sing bout now. I stay sing dis fo you, Da One In Charge.

² I goin tink plenny bout how fo live Fo nobody poin finga me. So den, wen you goin come by me? Wen I stay inside my palace Fo judge peopo, I goin know Nobody can poin finga me.

³ I no goin even look At good fo notting kine stuff. I hate peopo dat make Crooked kine deals. I no goin do notting lidat!

⁴ I no goin take all da crooked kine stuff peopo talk bout. I no goin even know how Fo do wass bad.

⁵ Anybody go talk bad bout his fren, So da fren no can hear wat he tell, I goin wipe out da guy dat talk bad. Anybody tink dey it An odda peopo ony junk, I had it wit dem too.

⁶ I goin look good fo find out Who fo trus inside dis land, Fo dem live wit me. Da ones dat stay live da way Nobody can talk bad bout dem, Dey goin be my helpa guys.

⁷ Nobody dat bulai peopo Goin stay inside my palace. Nobody dat tell tings dat not true Can come in front me.

⁸ Firs ting ery day, I goin wipe out All da peopo inside dis land Dat stay do bad kine stuff. I goin cut off da ones Dat stay do wass wrong Fo dem no live inside da town Wea Da One In Charge live.