Songs 100 - Hawaii Pidgin BibleSong Fo Tell God “Mahalo!” 1 Erybody all ova da world, Yell to God Cuz you feel good bout him! 2 Go in front Da One In Charge Cuz you stay good inside! Wen you stay in front him, Yell fo show him how you feel inside! 3 Fo shua you gotta know dis: Da One In Charge, he God! He da One wen make us guys, An us guys his peopo! Jalike us da sheeps Dat he lead to da grass. 4 Wen you go thru da gate to his place, Tell him “Mahalo!” Wen you go inside Da open lanai fo his Temple, Tell erybody he da greates! Tell um dat you his peopo, An dat you know he da kine God Dat stay do good tings fo you guys! 5 Cuz Da One In Charge, he good! He stay tight wit his peopo foeva! Yoa kids An da ones dat goin come from dem, Dey goin know fo trus him Jalike you guys know fo shua Fo trus him! |