Smart Guys 24 - Hawaii Pidgin Bible

19

¹ No tink you like get wat da bad guys get. No like fo hang out wit dem.

² Cuz da bad guys ony like tink How fo hurt somebody. Da way dey talk, Az ony fo make trouble.

20

³ Fo make yoa ohana come strong, Make shua da peopo know wat fo do erytime. Make shua dey real good fo eryting, Den fo shua dey goin come solid.

⁴ Wen yoa ohana peopo know plenny stuff, All da rooms inside dea house Goin get plenny nice kine stuffs Dat odda peopo no can get.

21

⁵ Da guy dat know wat fo do erytime, He strong. Da guy dat know plenny stuff, He come mo strong.

⁶ Cuz fo make war, You need diffren peopo Fo help you make one good plan. You gotta lissen plenny peopo Dat can tell you wass good fo do, Fo you win da war.

22

⁷ Da peopo dat do bad kine stuff An dat no bodda dem, No way dey goin undastan Wat da guys dat know wat fo do erytime, tell. Az why, wen dey go by da importan peopo, Dey no mo notting fo tell.

23

⁸ Da guy dat tink plenny How fo do bad kine stuffs, Peopo goin call him Da Guy Dat Like Make Trouble.

⁹ Wen peopo make one plan Fo go all out fo do stupid kine stuff, Az no good! An da big head kine guys Dat ony talk bad bout erybody, Odda peopo tell dey pilau.

24

¹⁰ If you lose fight Wen get big kine trouble, Fo shua, you not real strong!

25

¹¹ Wen peopo like kill somebody Dat neva do notting wrong, You gotta do someting fo stop um! Wen dey goin kill um, An da guy shaking an no can run away, No let um mahke!

¹² An if you make Like you neva know notting, Fo shua, Da One In Charge know How you stay inside. An he goin know How come you neva do someting, O if you neva know fo real kine. An da same way erybody make, Az how Da One In Charge goin pay um back.

26

¹³ Eh my boy, eat honey, cuz az good. Da honeycomb taste real sweet wen you eat um.

¹⁴ Fo shua, if you know wat fo do erytime, Dat goin make you stay good inside, Jalike wen you eat honey. If you learn wat fo do erytime, Den wateva happen afta dat, eryting goin be good. Fo wateva you stay wait fo, Notting goin hold all dat back.

27

¹⁵ No ack jalike one bad guy An go wait outside da house Wea one guy dat do wass right erytime stay, Fo you jump um an hurt um, Den go jam up da place wea he res.

¹⁶ Cuz da kine guy dat do wass right erytime, No matta he fall down seven time, He goin come right back up. But da bad guys, dey goin stay down Weneva bad tings happen to dem.

28

¹⁷ Wen somebody dat stay agains you get trouble, No feel good bout dat! Wen da guy no can handle, No feel good bout dat!

¹⁸ No good, cuz if Da One In Charge see Dat you feel good bout wat stay happen Wen da guy dat stay agains you get trouble, Da One In Charge no goin like how you stay do! Den, he no goin stay huhu wit da odda guy.

29

¹⁹ No make so you come all bum out Bout da peopo dat stay do bad kine stuff. No come jealous Jus cuz da bad kine peopo get stuff dat you no moa.

²⁰ Cuz fo da bad kine peopo, Wateva happen afta dat, Az fo shua no goin come good. Jalike God goin pio dea light.

30

²¹ Eh my boy, stay sked a Da One In Charge An da king. But no hang out wit da kine govmen guys Dat ony like get mo an mo powa!

²² Cuz real fas, Da One In Charge an da king Goin wipe out dat kine guys, An nobody know how plenny dey goin suffa.

Odda Stuff Da Smart Guys Tell

²³ An now, some odda tings from da guys dat know wat fo do erytime: Wen you da judge, No good you judge diffren kine fo some peopo.

²⁴ Da kine judge dat tell “Az okay, no can find notting agains you” Wen somebody wen do one bad ting, All da diffren peopos goin like put kahuna On top dat kine judge. Da diffren nations goin come huhu An tell az no good, how he make.

²⁵ But da kine judges dat punish Da ones dat wen do one bad ting, Erybody goin feel good bout dose kine judges, An goin aks God Fo do good tings fo dem.

²⁶ Wen somebody talk to you fo real kine An no bulai you, Az jalike dey kiss you, Cuz dey show dey yoa fren fo real kine.

²⁷ Make ready all da outside kine work you gotta do, An make da field ready fo plant. Afta dat, go build yoa house.

²⁸ No go in front da judge An tell um wat you wen see anodda guy do, If da guy neva do notting. O if you gotta tell da judge someting, No bulai.

²⁹ No go tink, “Eh, I goin make to dat buggah Jalike he wen do to me! I goin pay um back fo dat!”

³⁰ One time, I go by da field an da grape farm Dat one lazy buggah own, Dat guy, he not too smart!

³¹ An you know wat?! Get plenny weed all ova da place, An thorn bush all ova da groun! Da stone wall, all broke down!

³² Me, I look, an I start fo tink plenny From wat I see dea. I learn how fo live da right way.

³³ Dis wat I learn: If you sleep litto bit, kick back litto bit moa, Roll ova fo you moemoe some moa,

³⁴ Real fas, you goin come broke, Jalike one steala guy wen come rip you off. You goin need kokua, but nobody goin come kokua you, Jalike one robba jump you.