Smart Guys 22 - Hawaii Pidgin Bible

¹ Mo betta get good name from da peopo, Den own plenny kine stuffs. If peopo tink you one good guy, Az mo betta den silva an gold.

² Da rich peopo an da peopo dat no mo notting, Dey same same. Da One In Charge Him da One make all dem.

³ Da akamai kine peopo see Someting bad goin happen, An dey go hide. But da peopo dat donno notting An easy fo bulai dem, Dey keep going, An bumbye, dey pay da price.

⁴ Wen you make um so you come jalike you notting, An you feel jalike you sked Wen you come in front Da One In Charge, Den you goin get plenny stuffs, An peopo goin show you respeck, An you goin live long time.

⁵ Ery place da crooked kine guy go, Jalike get thorn bush an trap all ova da place Fo stop him. But da kine guy dat take good kea his life, He no goin go dat way.

⁶ Help yoa kids start fo go da right way wen dey small. Den, even wen dey come ol, Dey no goin go da odda way.

⁷ Da rich guys tell da guys dat no mo notting Wat dey gotta do. Same ting, da guys dat borrow money, Dey jalike one slave dat gotta do Wateva da guy tell um fo do Dat lend um da money.

⁸ Anybody do bad kine stuff, Dey goin get plenny trouble cuz a dat, Jalike somebody throw bad kine seed An bumbye, dey gotta eat da kine food dat come from dat. Da ones dat do bad kine stuff come huhu An like wack erybody, Still yet, dey no goin get notting.

⁹ Whoeva like do good tings fo peopo, God goin do good tings fo dem, Cuz dey give some a dea food To da peopo dat no mo notting.

¹⁰ Kick out da stupid buggahs Dat tink dey no need learn notting! Den da guys dat tell dey like fight Goin go way too. An peopo no goin take odda peopo In front da judge, Fo talk bad bout dem.

¹¹ But if you fo real kine like get one good heart, An you know how fo talk wit respeck, Da king goin be yoa fren.

¹² Da One In Charge, he stay watch fo make shua Dat wateva stay true, goin stay true foeva. But weneva one two face guy tell someting, Da One In Charge goin jam up wat da guy tell.

¹³ Da kine guy dat too lazy fo go work tell, “Get lion outside dea!” O he tell, “I no goin go outside on da street, Bumbye somebody goin kill me!”

¹⁴ If you lissen da wahines Dat not yoa wife, Da ones like fool aroun wit you, Watch out! Her jalike one deep hole fo trap you. Wen Da One In Charge stay huhu wit somebody, He let da guy lissen dat kine wahines An fall inside dea trap.

¹⁵ Kids, dey like go all out fo do stupid kine stuff. Az why dey need one good wack Fo make shua dey learn da right way, An fo no tink fo do stupid kine stuff.

¹⁶ Wen somebody presha da peopo dat no mo notting Fo him come rich from dem, Dat guy bumbye no goin get notting! O he give one nice present to da rich peopo, Fo make him come rich, Same ting, he no goin get notting.

Thirty Tings Da Smart Guys Tell

¹⁷ Lissen good, wat da guys tell dat know wat fo do erytime. An make shua you undastan Da tings I know.

¹⁸ Cuz wen you keep all dis stuff inside you, Eryting goin be real good. Den eryting you wen learn Goin stay ready fo tell odda peopo.

¹⁹ Cuz I like you make Da One In Charge Da One you trus! Az why I make shua right now Dat you know all dis stuff.

²⁰ I wen write fo you Thirty tings, fo show you wass good fo you do, An tings you gotta know,

²¹ Fo help you undastan da true words you can trus, An fo you take back da true kine stuff you wen learn To da guy dat wen tell you fo come by me.

1

²² No go bus up one guy dat need plenny An rip off his stuffs, Jus cuz you know you can. No go bring one guy dat no can pay notting, In front da judge guys fo sue um,

²³ Cuz Da One In Charge, him goin be da One Dat goin help dose guys in front da judge. An fo da ones dat take away stuff from dem, He goin take away dea life!

2

²⁴ No come frenz wit da kine guys Dat get mad bout eryting. No hang out wit da kine guys Dat come huhu weneva someting happen.

²⁵ No good fo you learn how fo do Jalike dat kine guys. Cuz den you no can stop, Jalike you stay inside dea trap.

3

²⁶ No be da kine guy dat make one deal An tell, “If dis odda guy no can pay off wat he owe, Den I go pay um off.”

²⁷ Cuz bumbye, if you no mo enuff fo pay, Da guy dat lend da money to da odda guy Even can throw you outa yoa bed An take dat away from undaneat you.

4

²⁸ No go move da property pin dat yoa ancesta guys wen put Fo show wea yoa land end, Fo you steal land from da odda guy.

5

²⁹ Wen you spock somebody Dat know how fo do his work real good, Dat guy, goin work fo da king guys, Not fo da kine guys dat nobody know.