Job 25 - Hawaii Pidgin Bible

Bildad Talk Moa

¹ Den Bildad from Shuh tell:

² “God da one dat in charge, So mo betta stay plenny sked a him. He make eryting stay pono, Inside da mos high place in da sky.

³ Can count how much army guys God get?! No can! Get anybody his light no reach?! Not even!

⁴ So! How can one guy get um right wit him, aah?! Erybody dat wen born, how dey goin stay clean inside?!

⁵ Even da moon look jalike no shine, in front God. An da stars not clean da way he see um.

⁶ Den fo shua, da peopo, dey mo worse den dat, Jalike dey maggots! One guy jalike ony one worm!”