Jeremiah 15 - Hawaii Pidgin Bible

No Mo Pity Fo Da Judah Peopo

¹ Den Da One In Charge tell me: “No matta if Moses an Samuel stay stan in front me praying, no way I goin feel pity fo dis peopo! Take dis peopo away from me!

² If dey tell you, ‘Wea we goin go?’ tell um, ‘Dis da message from me, Da One In Charge: “ ‘Da ones dat suppose to mahke cuz dey sick goin mahke from dea sick. Da ones dat suppose to mahke cuz a war goin mahke cuz a war. Da ones dat suppose to mahke cuz no mo food goin mahke cuz no mo food. Da ones dat suppose to come prisonas goin come prisonas.’ ”

³ Da One In Charge tell: “I goin sen four kine tings fo wipe dem out: guys wit swords fo kill dem, da dogs fo drag da bodies out, da birds inside da sky, an da wild animals inside da fields fo eat um up an wipe um out.

⁴ I goin make all da diffren peopos an dea kings come bum out all ova da earth cuz a wat Manasseh, King Hezekiah boy, wen do inside Jerusalem.”

⁵ Da One In Charge tell: “Who goin show pity fo you Jerusalem peopo? Nobody! Who goin cry fo you guys cuz dey stay sad inside? Nobody! Who goin go by you an aks how you stay? Nobody!”

⁶ Dis, da message from Da One In Charge: “You guys da ones dat bag from me awready. You guys no give a rip an you go way from me. So I goin grab you guys an wipe you out. I had it awready! I no goin show you love an pity no moa!”

⁷ Den Da One In Charge tell: “I goin judge da Judah peopo Wea da judges come togedda inside dea towns all ova da land, Jalike peopo throw da wheat in da air Fo da wind blow away da junks. I goin wipe dem out An make shua dea kids mahke, Cuz dey no change wat dey do.

⁸ I goin make dem get mo plenny widows Den da ocean get sand. Noon time, I goin bring somebody Fo wipe out da young guys. Right den an dea I goin make dea muddahs Come sore inside an stay real sked.

⁹ Even da muddahs dat wen born seven boys Goin come weak an pass out. All dea boys gone awready. Jalike da sun no shine fo dem no moa, even if stay day time. Dey goin come shame, an donno wat fo do! Da res a da guys dat stay alive still yet I goin make da guys dat stay agains dem make war an kill um.” Az da message from Da One In Charge.

¹⁰ Den I tell: “Bummahs! Cuz my muddah wen born me Fo be da kine guy dat dis whole land like fight me An fight bout me. But I neva len nobody notting, An nobody borrow notting from me. Still yet, dey all like put kahuna on top me!”

¹¹ Da One In Charge tell: “Garans I goin get you outa dis Fo eryting come good fo you, Jeremiah. Garans I goin make da peopo dat stay agains you Come aks you fo help dem wen dey in trouble an get hard time.

¹² “You tink one guy can broke da army dat goin come from da north, Jalike somebody broke iron an bronze metal? No can!

¹³ All da rich kine stuff you guys get, I goin let da army guys dat come rip um off. Dey no goin buy um, Cuz a all da real bad kine stuff you guys do All ova yoa country.

¹⁴ I goin let da peopo dat stay agains you guys Take you guys away Inside one land you guys donno from befo time. I goin do all dis cuz I stay real huhu wit you guys, Jalike one hot burning fire.”

¹⁵ Den I tell: “You Da One In Charge, you know how I stay. No foget me! You gotta take kea me. Pay back da peopo dat stay come afta me. No wait long time fo get mad wit dem. You gotta get me outa dis! You know how dey make me come shame Cuz I yoa guy.

¹⁶ Wen I hear wat you tell, I lissen real good, Jalike I stay eat um up! All dat make me stay good inside, Make me like dance an sing. Cuz peopo know I stay tight wit you! Da One In Charge, you da God Ova All Da Armies!

¹⁷ I neva hang out wit peopo dat like good fun An make big party wit dem. I ony stay wit nobody, cuz you stay in charge a me, An cuz you make me come plenny huhu wit dose peopo.

¹⁸ How come I still stay suffa? An how come my plenny sores no heal, an no like come good? You goin come Jalike one small stream Dat stay all dry up, o wat?! You goin come jalike one puka Dat no can trus fo get watta inside, o wat?!”

¹⁹ Az why Da One In Charge tell me dis: “Jeremiah, if you come sorry an change, I goin let you come back by me An work fo me one mo time. If you tell me stuff dat good fo me hear, An no tell wase time kine stuff, You can talk fo me one mo time. Let dese peopo come do stuff yoa way, But you betta not do stuff dea way!

²⁰ I goin make you come jalike one bronze wall Dat dese peopo no can broke down. Dey goin make war agains you, But dey no goin win ova you. Cuz I stay wit you Fo get you outa trouble. Dass me, Da One In Charge, tell you dis!

²¹ “I goin get you outa da trouble Dat da bad kine guys like make fo you. I goin buy you back so da guys no goin grab you An make you come sked.”