Isaiah 64 - Hawaii Pidgin Bible

¹ Eh, Da One In Charge, I wen like fo you open da sky An come down hea awready! If you wen do dat, da mountains goin shake Jalike get earthquake, An fall down in front you!

² Jalike wen da fire make da dry wood burn An make da watta boil, I wen like fo you come down hea awready So da peopo dat stay agains you Goin know wat kine god you, An da diffren peopos Goin come sked an shaking in front you.

³ Befo time you wen do awesome an unreal kine stuff Dat us guys neva tink you goin do. You wen come down, An da mountains shake jalike get earthquake An fall down in front you,

⁴ From da time eryting start, Nobody eva hear o see Some odda god dat do awesome stuff Fo da peopo dat stay wait fo him. You da ony God can make lidat.

⁵ You come fo help da peopo dat do da right ting An stay good inside cuz a dat, An no foget how you make. But fo shua, wen us still do bad kine stuff, You wen stay huhu! Az why us gotta live how you like us live An live lidat foeva! Dass da ony way us goin get outa trouble!

⁶ All us guys wen come Jalike somebody dat do pilau kine stuff An no can come in front you, Da One In Charge, cuz a dat. All da tings we do fo show we stay do da right ting, Jalike pilau an dirty kine rags. We all lose fight, jalike one dry up leaf. An da bad kine stuff we do, wipe us out Jalike wen da wind blow away da leaf.

⁷ No mo nobody know wat kine god you, So nobody call you fo help um. No mo nobody try fo hang in dea wit you, Cuz you no like even look at us guys. You make us lose fight, So da bad kine stuff we do, take ova us.

⁸ Still yet, Da One In Charge, you oua Faddah. Us, jalike da clay. You, da guy dat make us guys come jalike clay pots. All us guys, you wen make us.

⁹ Eh! Da One In Charge, no stay mo huhu wit us guys, Mo den us can handle! No rememba foeva da bad kine stuff we wen do. Look at us, cuz all us guys, yoa peopo.

¹⁰ Da towns dat stay spesho fo you, Now no mo notting dea. Even on top Mount Zion, no mo notting! Yoa main town, Jerusalem, Stay all bus up!

¹¹ Oua awesome Temple, dat stay spesho fo you, Wea oua ancesta guys wen tell Dat you da greates, Dat all burn down. All da nice tings we wen get, All one pile a junk now.

¹² So den, Da One In Charge, afta all dese tings happen, You still yet goin hold back, o wat?! You still yet no goin talk notting, o wat?! You still goin make us guys get presha Mo den we can handle, o wat?!